Psalms 13 - Keley-i Bible (Antipolo Ifugao)

Ya a-appeh David ni meidwat etan ni kamengipappangngulun a-appeh

¹ Apu Dios, kaw e-wayen muwak ni ingganah? Pigan tu penengngudan mun hi-gak?

² Pigan tu hu kepappegan eyan kakemunnumunnuin nemnem ku? Ey kaw kewa-wa-wan umlelemyungngak katteg ngu? Entan tu anhan iebulut ni apputen da-ak ni ingganah idan buhul ku.

³ Apu Dios, uhdungi muwak anhan et dengelen mu dasal ku. Ey pambangngad mu elet ku e Dios ku ma-lat eggak ni matey.

⁴ Ipaptek muwak anhan ma-lat eleg mabalin ni da-ak apputen idan buhul ku et eleg idalli man-am-amleng ni nengapput ni hi-gak.

⁵ Apu Dios, nakka medinnel e nehammad hu impeminhed mun hi-gak niya nakka man-am-amleng, tep inamtak e baddangan muwak et meihwangngak di pehding idan buhul ku.

⁶ Impeang-ang mu hu kakinayyaggud mun hi-gak, et humman hu, nakka i-ena-appeh hu nakka penaydayaw ni hi-gam.