Psalms 127 - Keley-i Bible (Antipolo Ifugao)

Ya a-appeh nan Solomon ni pantetyedan di Jerusalem

¹ Hedin eleg umbaddang hi Apu Dios ni memehwat ni hakey ni baley, ey endi silbin nea-atuan ni nengapya. Hanniman dama hu bebley e hedin eleg ippaptek nan Apu Dios, ey endi silbi tun an pengugguwalyaan ni nunman ni bebley.

² Ey anin ni nemahhig hu kapangngunnun hakey ni tuu e kaumhaleman niya kaumtukal, et endi silbitu hedin eleg baddangin Apu Dios. Tep tu ngu dedan kaiddawat hu mahapul idan tutu-u tun pinpinhed tu, anin ni eleg ida umtukatukal.

³ Yadda u-ungnga ey hi-gada bendisyon ni indawat Apu Dios.

⁴ Yadda in-ungnga tayun kekat-agu tayu ey ida kamei-ellig di panan sindalu.

⁵ Man-am-amleng hu tuun dakel hu u-ungnga tu, tep heni dakel panetu et eleg meapput hedin mekihhanggad buhul tu.