Psalms 126 - Keley-i Bible (Antipolo Ifugao)

Ya a-appeh ni pantetyedan di Jerusalem

¹ Yan eman ni nengibangngadan Apu Dios ni hi-gatsud Jerusalem ey heni i-innep ni ebuh.

² Nemahhig hu amleng tayu et manggalgalakgak itsu niya immena-appeh itsu. Et emin ida katuutuud edum ni bebley ey kanday “Makulug ni kayyaggud ni peteg hu impahding Apu Dios ni hi-gada.”

³ Em, makulug ni kakkayyaggud hu impenahding Apu Dios ni panyaggudan tayun nunman et man-am-amleng itsun peteg.

⁴ Et humman hu, Apu Dios, attu anhan et panyaggud mu mewan hu biyag mi, henin kakelbengin nema-ganan ni kulukul hedin immudan.

⁵ Em, hanniman ipahding mu ma-lat yadda etan tuun limmewalewan nantaneman da ey umyaggud hu intanem da et man-an-anladdan pan-ennian da.

⁶ Em, makulug ni emin ida hu nannannangngih ni nantaneman da ey bendisyonan idan Apu Dios et i-ena-appeh dalli hu amleng dan mengi-ennamut ni ineni da.