Psalms 122 - Keley-i Bible (Antipolo Ifugao)

Ya a-appeh nan David ni pantetyedan di Jerusalem

¹ Immamlengngak ni nanghelan dan hi-gak e kanday “Elaw itsud baley nan Apu Dios.”

² Et deh e immali kami et kami kaman-eh-ehneng eyad eheb ni Jerusalem.

³ Huyyan bebley di Jerusalem ey neiyayyaggud hu nengapya da niya nanhehennup hu baballey.

⁴ Ida kaum-alidyan emin hu helag Israel ni tutu-un Apu Dios ni menaydayaw ni hi-gatu, tep humman hu intugun tun pehding da.

⁵ Ey yadya kapanha-adiddan kamanhuluhulul ni patul ni helag David ni menuwet idan tutu-u dan helag Israel.

⁶ Idasali tayu hu Jerusalem ma-lat luminggep. Ya pinhed ku ey emin ida hu neminhed ni nunyan bebley ey umyaggud hu biyag da.

⁷ Em, ya kayyaggud ey umlinggep hu Jerusalem, anin idad baley ni patul.

⁸ Ey gapuh idan aaggik niya gagayyum ku ey kangkuy “Linggep ka e bebley di Jerusalem.”

⁹ Ey gapuh ni baley ni Ap-Apu e Dios tayu ey nakka iddasal e ya kayyaggud hu mekapkapyad Jerusalem.