Psalms 121 - Keley-i Bible (Antipolo Ifugao)

Ya a-appeh ni pantetyedan di Jerusalem

¹ Intangaw kuddad duntug ey kangkuy “Attu na-mu kelpuan ni umbaddang ni hi-gak?”

² Nem inamtak e hi Apu Dios, e nanletun puyek niya kabunyan, hu kaumbaddang ni hi-gak.

^3-4 Anin ni hi-gayu et baddangan dakeyun hi-gatu et maka-ippaptek kayu. Tep eleg meuggip hi Apu Dios niya eleg meblay ni mengi-eddug ni hi-gatsun helag Israel.

⁵ Hi Apu Dios hu kamenguh-uhdung ni hi-gatsu niya hi-gatu hu kamengippaptek ni hi-gatsu, anin ni attu kad-an tayu,

⁶ ma-lat endi an meippahding ni lawah ni hi-gatsun hileng ni yan kawwalwal.

⁷ Hi-gatu hu kamengihwang ni hi-gatsud lawah ni kamekapkapya, tep hi-gatu kamenettengnged ni biyag tayu.

⁸ Em, anin ni attu lawwan tayu et ippaptek daitsun hi-gatun ingganah.