Psalms 120 - Keley-i Bible (Antipolo Ifugao)

Ya a-appeh ni pantetyedan di Jerusalem

¹ Nakka meligligasi et mampehemmehemmekkak nan Apu Dios di dasal ku ey dingngel tu dasal ku.

² Kangkud dasal kuy “Apu Dios, ihwang muwak anhan idad mangkaitek niyaddad mangkaheul ni tutu-u.”

³ Hi-gayuddan mangkaitek, ey nanna-ud ni nemahhig ali hu pengastigun Apu Dios ni hi-gayu.

⁴ Em, nemahhig ali hu pengastigu tun hi-gayu e heni dakeyulli pennaen niya heni dakeyulli ittangtang di ngalab.

⁵ Nakka manligligat ni mekibbebley ida eyan mangkabunget ni tutu-u e heni-ak nekibebley di Meshek winu yad Kedar.

⁶ Impeinglay kun mekihahha-ad di hanneyaddan tutu-un ya pambubuhhihian hu pinhed da.

⁷ Hedin nakka pan-e-hela hu meippanggep ni linggepan ey daka pehebballi hu mekiggubbat.