Psalms 115 - Keley-i Bible (Antipolo Ifugao)

¹ Apu Dios, beken ni hi-gami hu medeyyaw, nem hi-gam ni ebuh tep eleg melullumman hu impeminhed mu niya kamannananeng hu muka pemaptek ni hi-gamin tuum.

² Kele kan idan tutu-ud kebebbebley ey “Attu mewan hu Dios yu ey?”

³ Ya Dios tayu ey immen di kabunyan. Ey tuka pehding hu hipan pinhed tun pehding.

⁴ Nem hedin yadda dios da ey ya silber niya balituk hu nekapyaan da e kinapyan tuu.

⁵ Wada bungut da, nem eleg ida um-ehel niya wada mateda, nem eleg da han-ang-ang.

⁶ Wada tangila da, nem eleg da handengel niya wada eleng da, nem eleg da hanhamuy.

⁷ Wada ngamay da, nem eleg da hankapa, ey wada heli da, nem eleg ida umdalan. Ey anin ni buklew da et eleg umge-hem.

⁸ Emin ida hu kamengennapya niya kamengiddinnel idan nunman ni dios ey mambalin idan heniddan nunman ni dios dan daka kennapyaa.

⁹ Et humman hu, hi-gatsun helag Israel ey pannananeng tayun idinel hi Apu Dios. Tep hi-gatu hu kaumbaddang niya kamengippaptek ni hi-gatsu e heni happiyaw tayu.

¹⁰ Emin kayun papaddin helag Aaron ey hi-gatu dama idinel yu. Tep hi-gatu hu kaumbaddang niya kamengippaptek ni hi-gatsu e heni happiyaw tayu.

¹¹ Anin ni hi-gayuddan edum ni kamengu-unnud nan Apu Dios et hi-gatu idinel yu. Tep hi-gatu hu kaumbaddang niya kamengippaptek ni hi-gatsu e heni happiyaw tayu.

¹² Nemnemen daitsun Apu Dios et bendisyonan daitsun helag Israel, anin idan edum tayun papaddi tun helag Aaron.

¹³ Bendisyonan tuddan emin hu kamengu-unnud ni hi-gatun newetwet niya kedangyan.

¹⁴ Ya kayyaggud ey bendisyonan daitsun Apu Dios et dumakkel itsu niya mangkehlag ida u-ungnga tayu niya inap-apu tayu.

¹⁵ Em, ya kayyaggud ey bendisyonan daitsun Apu Dios e nanletun puyek niya kabunyan.

¹⁶ Lintu tu kabunyan ni panha-adan tu niya lintu tu dama eya puyek ni panha-adan tayun tuu.

¹⁷ Beken ni yadda etan nangketey hu mengidaydayaw nan Apu Dios, tep limmaw idad kalawwin netey.

¹⁸ Nem hi-gatsun mategu hu menaydayaw nan Apu Dios ni ingganah. Daydayaw tayu hi Apu Dios!