Psalms 111 - Keley-i Bible (Antipolo Ifugao)

¹ Daydayaw tayu hi Apu Dios! Mansalamattak nan Apu Dios di kakeemmungiddan tutu-u tun kamekangngu-unnud ni hi-gatu.

² Kakkayyaggud ni emin hu kapehding Apu Dios. Et humman hu, emin ida hu kamengu-unnud ni hi-gatu ey pinhed dan ewwatan ida humman ni tuka pehpehding.

³ Humman idan tuka pehpehding hu kakei-ang-angin dayaw tu niya kasina-gey tu. Ey kamannananeng ni ingganah hu kakinayyaggud tu.

⁴ Eleg tu pinhed ni tayu liwwanen ida humman ni kayyaggud ni tuka pehpehding ni hi-gatsun tuu. Hi Apu Dios ey kabbabbal niya mahmek.

⁵ Tuka iddawat hu kennen idan kamengiddinnel ni hi-gatu niya eleg tu liwwana hu nekitbalan tun panyaggudan da.

⁶ Impaenang-ang tu hu et-eteng ni kabaelan tun nampeneg-alan tuddan nambebley di Kanaan et ihullul tudda tuu tu.

⁷ Neiptek niya limpiyuh ni emin hu tuka pehding niya emin hu tugun tu ey kameiddinnel.

⁸ Humman idan tugun tu ey mannananeng ni makulug alin ingganah. Et humman hu, mahapul ni paka-u-unnuden tayu ma-lat limpiyuh hu pehpehding tayu.

⁹ Impahding tu hu mahapul ni pehding tu ma-lat meihwang ida tutu-u tud neihbutan da. Ey mannananeng alin ingganah hu nekitbalan tuddan tuu tu. Kayyaggud ni peteg niya kamedeyyaw hu ngadan tu.

¹⁰ Ya kapengu-unnudin Apu Dios hu kakenemnemi. Ey emin ida hu kamengu-unnud ni tugun tu ey inamta da hu kayyaggud ni pehding da. Hi-gatu hu lebbeng tun daydayawen tayun ingganah!