Malachi 4 - Keley-i Bible (Antipolo Ifugao)

Ya aggew ni gintud nan Apu Dios ni penuwetan tun tutu-u

¹ Kan Apu Dios e Kabaelan tun emin ey “Kamangkedettengi hu aggew ni kehuwetan ni tutu-u. Megihheb idallin emin hu kamampeta-gey niya lawah daka pehpehding ni tutu-u etan di kaumhihinyab ni apuy et heniddalli negiheb ni dagemi e endilli metdaan ni hi-gada.

² Nem hedin hi-gayun kamengu-unnud ni hi-gak ey ang-angen yulli kakinayyaggud ku e henilli aggew e bebnangan dakeyu et yumaggud kayulli. Man-an-anla kayullin heniddan impah ni bakan neibukyat di kubkub.

³ Yan nunman alin aggew ey heniddalli dep-ul hu tutu-un lawah daka pehpehding, tep pan-iggasin yuddalli.

⁴ Mahapul ni nemnemen yu et u-unnuden yudda intuttudduk ni pehding yu niya Tugun kun indawat kun bega-en ku e hi Moses di Duntug e Sinai e humman ida hu u-unnuden yun emin ni helag Israel.

⁵ Nem dengel yu eya e-helek! Peellik ali ni hi Elijah e prophet et han medatngan etan nemahhig ni anggetakkut ni aggew ni gintud nan Apu Dios.

⁶ Yalli tuttuddu tu hu mengippeyaggud ali law ni pannemnem idan a-ammed ni u-ungnga da niya kayyaggud ali dama law hu pannemnem idan kaungaungan a-ammed da. Tep hedin eleg meippahding huyya ey um-ali-ak et bahbahek hu bebley yu.”