Job 39 - Keley-i Bible (Antipolo Ifugao)

Intu-man Apu Dios ni immehel nan Job

¹ Kaw inamtam hu getud ni pan-ungngaan idan gelding di duntug? Ey kaw inang-ang mu hu ina-nun kapanpa-lekin makwah?

^2-3 Ey kaw inamtam hedin piga bulan da ni han ida limmukbub ni mampa-lek?

⁴ Hedin neetteng hu impah da et na-let ida law ey ngenamung idan lawwan da.

⁵ Hipa nengiebulut ni mambalin idan immeyew hu edum ni kebayyu?

⁶ Hi-gak ni ebuh nengituttuddun hi-gadan meteggu etan di neahinan ni palnah di eleg mebebleyi.

⁷ Ida kameiddawwid umpaliteng ni bebley et eleg ida mabalin ni meeyyum ma-lat mengu-unnud ida.

⁸ Yaddad duntug ni daka panha-adi hu daka penemmakin kennen da.

⁹ Kaw dammutun meeyyum hu immeyew ni baka ma-lat dammutun pangngunnu winu an manha-ad etan di nekapyan panha-adan tu?

¹⁰ Ey kaw dammutun i-iket mu hakey et pan-aledum?

¹¹ Kaw dammutun iddinel mud elet tu et maingunu hu ingngunum?

¹² Kaw dammutun hi-gatu iddinel mun mengi-ennamut ni pagey mu?

¹³ Ya ostrich ey elistun mengippeyagpag ni payak tu. Nem eleg tu han-apput hu stork ni umtayab.

¹⁴ Ey tuka hi-yanadda itlug tud palnah et ngenamung idan man-a-attung diman et manekeban.

¹⁵ Eleg tu ikkaguh hedin wada mengigsin winu iddeyapdap ni animal di muyung hu itlug tu et magmik.

¹⁶ Ey anin ni me-pah ida et henidda beken tun impah e eleg tu ikkaguh hedin mettey ida.

¹⁷ Hanniman nengapyak ni hi-gatu e endi nemnem tu tep eggak idwatan ni laing tu.

¹⁸ Nem hedin umbesik, man hi-gatu keka-ka-letan e tuka li-bahi tuun nantakkay di na-let ni peteg ni umbesik ni kebayyu.

¹⁹ Job, kaw hi-gam nengidwat ni elet idan kebayyu? Ey kaw hi-gam nengipatmel ni andukkey ni bewek di tengda da?

²⁰ Kaw hi-gam nengidwat ni elet dan umpaytuk e henin dudun? Ey kaw hi-gam nengidwat ni kaumtenul di eleng da et penattakkut dan tuu?

²¹ Hedin ida mekiggubbat man daka pan-iku-met heli dad puyek. Ey nemahhig e na-let idan umbesik.

²² Eleg da amtan umtakut ey eleg da tekkusi ispadah.

²³ Kamangkillang almas idan sindalun nantakkay ni hi-gada niya kaumhili hedin naptangan.

^24-25 Hedin simmenul tangguyup e humman pengippeamtaan da e wada gubat man ihik idan umbesik. Eleg ida um-ineng. Ida kaumkenu-ngeh hedin dingngel da tenul ni tangguyup. Da mewan kagibbeka e wada gubat anin ni neidaddawwi kad-an da. Hedin dingngel da mandal idan ap-apun sindalu man ihik idan mekiggubbat.

²⁶ Kaw hi-gam nenuttuddun gawwang ni umtayab ma-lat mampalaw di south ni ahi kettekettelan?

^27-28 Kaw pakkadek mandalem hu tulduh et han tumyab di eta-gey ni an mengapyan buya tud ta-pew ni babattu etan idad naka-itta-gey ni duntug?

²⁹ Kaman-uh-uhdung diman et ang-angen tu animal ni dedpapen tun kennen tu,

³⁰ ni neamung ida impah tu et pangkanen da.”