Job 36 - Keley-i Bible (Antipolo Ifugao)

¹ Intu-man Elihu ni immehel e kantuy

² “Anusi yun dedngelen eya edum ni e-helen kun nakka pengi-ehnengin Apu Dios.

³ Huyyan neipeamtan hi-gak ey nalpu metlaing nan Apu Dios e nanletun hi-gak. Peang-ang kun hi-gayu e hedin hi-gatu man kayyaggud ni ingganah hu tuka pehding.

⁴ Endi itek ni nak e-helen ni hi-gayu tep hedin hi-gak man naka-amtak ni emin.

⁵ Hi Apu Dios ey et-eteng kabaelan tu, nem endi tuka pihhula. Ey tuka pehding emin hu pinhed tun pehding.

⁶ Eleg tu i-abulut ni mannananeng ni mategu hu lawah ni tuu, nem tuka iddawat hu kelebbengan idan anggehemmek ni tuu.

⁷ Tuka paka-ippaptek ida hu kayyaggud ni tuu et tuka pambalin idan meiddeyyaw ni ingganah henin patul.

⁸ Nem hedin nebangkilingan hu tuu et ida kamanhelheltap tep ya impahding da,

⁹ ey kapeamtan Apu Dios hu liwat da niya tuka peamta daka pampahhiyyai.

¹⁰ Ey tudda katugguna ma-lat isiked dan mengippahding ni lawah.

¹¹ Hedin u-unnuden da hi Apu Dios et ipahding da hu pinhed tu ey umlinggep ida niya umyaggud hu neitu-wan da.

¹² Nem hedin eleg ida mengu-unnud man mettey ida et lumaw idad bebley ni netey, tep kulang hu inamta da.

¹³ Yadda eleg mengu-unnud nan Apu Dios ey ida kaumbubunget ni pengastiguan tun hi-gada. Ey anin ni mekastigudda et eleg ida mampehemmehemmek ni hi-gatu.

¹⁴ Eleg ida mea-amma ey mettey idan anggeba-ing hu impenahding da.

¹⁵ Nem hedin yadda etan kamanligligat ey ihehwang Apu Dios ida. Tukai-abulut ni manliggat ida tuu tep humman tuka penuggun ni hi-gada.

¹⁶ Nem hedin hi-gam e Job ey indawwi dakan Apu Dios lan nunman di ligat ma-lat nelam-ay kad biyag mu. Impakedangyan daka niya impelinggep daka.

¹⁷ Nem yan nunya ey kaka umguguhu tep muka nenemneman neyun e eleg mekastigudda lawah ni tuu. Nem entan kadenagim tep meandeng ali meippahding.

¹⁸ Ey ang-ang mu kuma, tep mehe-ul kalli kumedek ni dakel ni pihhuh et ippahding mu lawah. Tep ya tuun mengippahding ni hanniman ey nelakah tun dedkugen hi Apu Dios.

¹⁹ Entan tu nemnem e ya kinedangyan mu niya et-eteng ni kabaelam hu mengikka-leg ni ligat ni um-alin hi-gam.

²⁰ Ey entan abtui kehillengan tu ma-lat panhanim ni annel mu, tep yad engeenget hu kakebahbahin tuu.

²¹ Ang-ang mu kuma et beken ni ya lawah ipenahding mu, tep impaelin Apu Dios hu ligat mu ma-lat eleg mu ipahding hu lawah.

²² Entan tu liwwan e hi Apu Dios ey kabaelan tun emin. Eleg tu heppula menuttuddun hi-gatu tep hi-gatu kelalla-ingan ni mittuduh.

²³ Endi tuun dammutun menghel ni hi-gatun pehding tu. Ey endi tuun an menghel ni neihalla impahding tu.

²⁴ Dayaw mu kumaddan hi Apu Dios tep ya impahding tu ey pan-a-appeh kan pandeyyaw mun hi-gatu.

²⁵ Inang-ang ni emin ni tuu hu impahding Apu Dios, nem eleg da awatan.

²⁶ Eleg han-awat ni tuu hu kasina-gey Apu Dios niya eleg da hambilang hu toon tu.

²⁷ Kapeahpat Apu Dios hu danum eyad puyek ni impambalin tun udan.

²⁸ Ey tuka peelli udan e kamelpud kulput ma-lat usalen emin ni tuu.

²⁹ Endi hakey ni tuun han-awat tu hedin inna-nun kulput ni meiwwehhit niya inna-nu et kaumkidul di kabunyan.

³⁰ Kapellaw mewan Apu Dios hu kedyam di kabunyan et anin di dallem ni baybay et kameang-ang heyaw tu.

³¹ Emin ida humman ni tuka pehding ni kaketngai ey pengippeang-ang tu e hi-gatu hu Ap-apun emin ni tutu-u. Ey tuka iddawat ni hi-gada hu dakel ni kennen.

³² Tuka peelli kedyam niya ngenamung tun pinhed tun pengippelawwan.

³³ Ya kidul ey heni kamantetkuk et peamta tu e wada hi Apu Dios. Ey ya pewek ni tuka peelli ey mengippeamtan nemahhig ni bunget tu.