Job 32 - Keley-i Bible (Antipolo Ifugao)

¹ Kapepillit Job e endi nambahulan tu et isiked ida law etan ni tellun gagayyum tun um-eheehel ni hi-gatu.

² Nem wada etan hi Elihu ngadan tu e eleg tu han-isipel bunget tu tep eleg pinhed Job ni ebbuluten e nambahul et hi Apu Dios kumedek tuka pebehhulin neipahding ni hi-gatu. Hi aman Elihu ey hi Barakel e helag Bus e helag Ram.

³ Ey kaumbubunget ida etan ni tellun gayyum Job tep eleg da hanhumang hi Job et heni kumedek law hi Apu Dios hu neihalla.

⁴ Hi-gatu hu keu-ungnga-an ni hi-gadan emin, et humman hu, hingged tu et megibbuh idan immehel.

⁵ Inang-ang tu e eleg da hanhumang hi Job ey bimmunget,

⁶ et kantuy “U-ungnga-ak nem hi-gayu, et humman hu, nakka um-e-gen ni menghel ni hi-gayun wadad nemnem ku.

⁷ Kangkud nemnem kuy ‘Yadda peppengulwan hu lebbengtun um-ehel tep nenemnemneman ida.’

⁸ Nem inamtak law e ya dedan hu Ispirituh Apu Dios hu kamengidwat ni nemnem niya kalinaing ni tuu.

⁹ Beken ni yadda nea-amman ebuh hu nenemneman niya beken ni hi-gadan ebuh hu kamengewwat ni neiptek.

¹⁰ Et humman hu, dengel yu anhan et ehelen ku dama hu wadad nemnem ku.

¹¹ Inan-anusan kun nandeddengngel ni in-inhel yun wadad nemnem yu.

¹² Nakadngel kun emin inhel yu ey endin hi-gayu nanghel hedin hipa neihallaan Job niya endin hi-gayu pakehumang ni hi-gatu.

¹³ Entan tu kaney ‘Anin ni eleg ebbuluten Job hu tugun tayu et ngenamung hi Apu Dios ni mengittuddun hi-gatun neihlaan tu.’

¹⁴ Gullat ni hi-gak hu nekihummangan nan Job, et beken ni hannitan penummang kun hi-gatu.

¹⁵ Kayu kaum-i-ineng tep eleg yu amta ihhumang yu.

¹⁶ Hipa tep law, kaw heheggeden ku e-helan yu? Kaw pakdag ku dama i-ineng?

¹⁷ Eleg, tep mahapul ni um-ehellak dama.

¹⁸ Eggak han-isipel ni nak pakdag i-ineng tep dakel pinhed kun e-helen.

¹⁹ Iyyadyan heni-ak etan ni pakekapyan ha-addan ni meinnum ni endi eghawan tu et ngannganihhak ni mebughi.

²⁰ Et humman hu, mahapul ni um-ehellak ma-lat ehlen ku dama hu wadad nemnem ku.

²¹ Endi nak pengippahhigan niya eggak e-hela e kayyaggud hu hakey ni tuu hedin eleg malpud puhuk,

²² tep endi ngud nemnem ku humman. Hakey pay ey nanna-ud ni kastiguen tuwak nan Apu Dios hedin hanniman pehding ku.