Job 23 - Keley-i Bible (Antipolo Ifugao)

Ya inhel Job

¹ Immehel mewan hi Job ey kantuy

² “Mahapul ni manlillihhak nan Apu Dios tep tuwak kapanhelheltap e eleg tuwak hehmeka.

^3-4 Gullat et anhan ni inamtak hu nak penemmakan ni hi-gatu et umlawwak di kad-an tu et nak makihummangan ni hi-gatudman,

⁵ ma-lat dengelek hedin hipa kantu ey ma-lat awatan ku e-helen tu.

⁶ Kaw apputen tuwak tep eta-gey ni peteg saad tu? Eleg! Inamtak et dedngelen tu e-helen ku.

⁷ Tep kayyagguddak ni tuu et dammutun mekihhummangannak ni hi-gatu. Nakka panna-ud e e-helen tu e endi bahul ku.

^8-9 Eggak amta kad-an Apu Dios. Anin ni attu nak penemmakan ni hi-gatu et endidman. Ey ma-nu tep inamtak e wada hi Apu Dios, nem eggak han-ang-ang.

¹⁰ Nem inamta tun emin hu nakka pehpehding. Et humman hu, hedin patnaan tuwak, ey ang-angen tu e heni-ak etan ni nemahmah ni balituk.

¹¹ Naka-u-unnud ku hu pinhed tun pehding ku. Endi nak impangil.

¹² Inu-unnud kun emin hu intuttuddu tun pehding ku. Ey nakka pekeddukdul hu ehel tu nem ya kennen.

¹³ Nem hedin hi-gatu man tuka pehding hu pinhed tu tep hi-gatun ebuh hu Dios. Hipa kuma hu dammutun menullul ni ninemnem tun pehding tu?

¹⁴ Endi, tep tuka ippahding hu hipan implanuh tun pehding ni hi-gak. Hi-gatu ngenamung ni pambalinan ni biyag ku.

¹⁵ Et humman hu, nakka umtatakut ni hi-gatu. Ey hedin nakka nemnemnema hu meippanggep ni hi-gatu man nakka umgeygey ni takut ku.

^16-17 Impambalin tuwak ni makattakut. Hi Apu Dios e Kabaelan tun emin hu nakka tekkusi, beken ida eya lawah ni kameipahpahding ni hi-gak e kamei-ellig di engeenget.