Job 19 - Keley-i Bible (Antipolo Ifugao)

Ya inhumang Job

¹ Himmumang mewan hi Job et kantuy

² “Pigan pengissikkedan yun um-eheehel tep-ay yuka panma-maa hu nakka panhelheltapi?

³ E-eggel ni pinel-itan yuwak. Eleg kayu pay anhan umbaing ni nuntan ni yuka pehpehding.

⁴ Anin dedan ni kantu et makulug ni wada lawah ni impahding ku, ey ngenamungngak ngu, entan pekidimdima-u.

⁵ Kaw kanyu nem kekeddukdul kayu nem hi-gak? Ey kaw kanyu nem ya eya ligat kun nakka helheltapa hu keang-angan tun makulug ni nekalliwtannak?

⁶ Kaw eleg yu ang-anga e hi Apu Dios hu nengipahding nunya? Heni-ak naknad kineman inheged tun hi-gak.

⁷ Nakka manlillih, nem endi kamenengngud ni mengngel ni hi-gak. Ey nakka manheppul ni umbaddang ni hi-gak, nem endi kamemaddang ni hi-gak.

⁸ Heni hinenian Apu Dios hu dellanen ku ey engeenget et eggak han-ang-ang.

⁹ Binangngad tun emin kinedangyan ku et ekalen tu dayaw ku.

¹⁰ Heni tuwak bineni-ki niya inendi tu namnamah ku.

¹¹ Kamei-ellig di apuy ni kamantettebbel bunget tun hi-gak, et humman hu, nemahhig tuka pehding ni hi-gak e heni tuwak buhul.

¹² Ey heni tu impaelidda sindalu tun mengubbat ni hi-gak et halikuban da-ak ma-lat depapen da-ak.

¹³ Impambalin tudda aaggik niya gagayyum kun eleg umhidit ni hi-gak tep anggebe-hel da-ak.

¹⁴ Anin idan nengam-amtan hi-gak et eleg da-ak law amta.

¹⁵ Yadda etan mangilik ni kaum-alialid baley ni nunman ey eleg idelaw umdu-ngaw. Anin idan bega-en kun bibi-i et heni-ak nalpud edum ni bebley e eleg da-ak law amta.

¹⁶ Hedin nakka man-e-ehhel idan bega-en ku man eleg da-ak law hengnguda.

¹⁷ Hedin ya dama ahwak ey eleg meihnup ni hi-gak tep nakka manhemmuy. Anin idan aaggik et eleg ida meihnup ni hi-gak.

¹⁸ Da-ak kaheghegnudaddan u-ungnga niya da-ak kangi-ngi-ngii hedin inang-ang da-ak.

¹⁹ Inwalleng da-ak idan nehammad ni gagayyum ku anin idan nakappinhed ku.

²⁰ Nekappiguttak e heni-ak genit et mablatan ey innang ni metteyyak.

²¹ Hemek yuwak kedi anhan e gagayyum ku tep hanneya impahding Apu Dios ni hi-gak.

²² Kele yuka pan-edumi hu ligat ni impehakbat tun hi-gak? Kaw yuka e-nguhi eya nakka helheltapa?

²³ Ma-nu-et anhan nem wada mannemnem ni mengittuddek eyan nakka e-e-hela et kapyaen dan libluh,

²⁴ winu ikku-lit dad batu ma-lat mannananeng diman ni ingganah.

²⁵ Nem inamtak e wadalli um-alin melpud kabunyan ni mengi-ehneng ni hi-gak.

²⁶ Ey inamtak e anin ni meteyyak et mabwel hu annel ku et ang-angen kulli hi Apu Dios.

²⁷ Em, makulug ni ang-angen kulli hi Apu Dios! Ey nakka um-aabtun menang-ang ni hi-gatu!

²⁸ Nem ay hi-gayuddan gagayyum ku ey kayu kaumhamahamak ni ippakpak yun hi-gak ni bahul niya yuka pedgeh hu nemnem ku tep kanyuy bahul ku eya nakka panhelheltapi.

²⁹ Nem pinhed kun amtaen yu e anin ni hi-gayu et mekastigu kayu tep ya henin nuntan ni yuka pannemnemnem. Et yan nunman ali pengamtaan yu e wada kamenuwes emin ni tuu.”