Jeremiah 1 - Keley-i Bible (Antipolo Ifugao)

¹ Huyyan libluh ey meippanggep idan inhel niya inebig Jeremiah e u-ungngan Hilkiah e hakey ni padid Anathot e nambebleyan idan helag Benjamin.

² Yan eman ni meikkehampulut tellun toon ni nampatulan Josiah e u-ungngan Amon di Judah ey immehel hi Apu Dios nan Jeremiah.

³ Immehel mewan ni hi-gatu eman ni nampatulan Jehoiakim e u-ungngan Josiah. Et mekihummangan law hi Apu Dios ni hi-gatu ingganah eman ni meikkelliman bulan ni meikkehampulut hakey ni toon ni nampatulan Sedekiah e hakey mewan ni u-ungngan Josiah. Yan nunman ey neilaw ida iJerusalem di edum ni bebley et mambalin idan himbut diman.

Ya inhel Apu Dios nan Jeremiah ni nemutukan tun hi-gatun mambalin ni prophet

^4-5 Kan Apu Dios ni hi-gak ey “Yan eman ni eleg daka ni letuen ey pinili daka ngu dedan ni hakey ni prophet ma-lat mansilbi kad tutu-ud kebebbebley.”

⁶ Nem hinumang ku hi Apu Dios e kangkuy “Apu Dios e Eta-gey ni peteg, eggak amta e-e-helen ku, tep u-ungnga-ak pay ni.”

⁷ Kan Apu Dios ey “Entan tu ehel huttan. Lakkay kumad kad-an idan tutu-un pengittu-dakan kun hi-gam et mu ehelen ni hi-gadan emin hu e-helen kun hi-gam.

⁸ Entan takut mu tep wada-ak ni memaddang ni hi-gam niya mengippaptek ni hi-gam. Hi-gak e Dios hu nanghel nunya.”

⁹ Entanni ey kinepan Apu Dios hu bibil ku et kantun hi-gak “Dengel mu huyya, e-helen kudda law ni hi-gam hu mahapul ni e-helen mu.

¹⁰ Ey iddawat kun nunya hu kelebbengan mud kebebbebley, anin idad kapan-ap-apuin papatul ma-lat dammutun pe-kal mu ey pappegen mu hu pan-ap-apuan da winu apputen mudda niya bahbahen mu pan-ap-apuan da. Ey iddawat ku kelebbengan mun mengippeyaggud ni pan-ap-apuan da.”

¹¹ Entanni ey kan mewan Apu Dios ni hi-gak ey “Jeremiah, hipa inang-ang mu?” Hinumang ku et kangkuy “Inang-ang ku pangan almond.”

¹² Kantuy “Neiptek hu inhel mu. Ang-angen ku ma-lat nanna-ud ni meippahding hu inhel kun pengastiguk.”

¹³ Entanni ey kan mewan Apu Dios ni hi-gak ey “Hipa inang-ang mu?” Hinumang ku mewan e kangkuy “Inang-ang kud north hu neiba-nget ni danum ni kamanlelewwag e nesigging et ngannganih ni meidduyyag di appit nunya.”

¹⁴ Kantuy “Melpuddallid north hu memahbah idan tutu-un nambebley deya.

¹⁵ Ngannganih ni eyyagan kudda tutu-ud bebley di appit ni north et gubaten da Jerusalem et yadda edum ni bebley di Judah et bahbahen dadda luhud et hegepen da. Et iha-ad idallin patul dad heggeppan di deya Jerusalem hu yuddungan dan man-ap-apu.

¹⁶ Humman hu pengastiguk idan tutu-uk tep yadda lawah ni impahding da. Inwallengan da-ak et ya edum ni dios hu dayawen da. Em, nengapyaddan dios da, et humman ida law hu daka daydayawa.

¹⁷ Imay, pandaddan ka et mu ehelen ni hi-gadan emin eya e-helen ku. Entan takut mun hi-gada tep lektattuy petekkut daka anhan law ni hi-gak di hinangga da.

^18-19 Dengel mu e Jeremiah! Emin ida hu tutu-ud Judah, anin idan papatul, yadda opisyal da niyadda papaddi ey anggebe-hel daka. Nem petuled dakan hi-gak ma-lat kabaelan mun mekihhanggan hi-gada. Mei-ellig kalli etan ni et-eteng ni bebley ni nakalluhud ey mei-ellig kalli etan ni gumek ni tukud niya giniling ni luhud et eleg daka kabaelan ni apputen, tep wada-ak ni memaddang ni hi-gam ey ippaptek dakan hi-gak. Hi-gak e Dios hu nanghel nunya.”