Genesis 16 - Keley-i Bible (Antipolo Ifugao)

Ya neiungngaan Ismael

¹ Hi Sarai e ahwan Abram ey nebasi et endi u-ungnga tu. Nem wada hi Hagar e bega-en tun iEgypt.

^2-3 Et kantun Abram ey “Anin ew ni iulig mu eya bega-en ku tep ay eleg i-abulut Apu Dios ni nak man-ungnga, et yalli u-ungnga yu hu pan-ungngak.” Ey inebulut Abram. Neipahding huyya eman ni nelabah hu hampulun toon ni nanha-adan dad Kanaan.

⁴ In-ulig Abram hi Hagar et mambutsug. Yan nengamtaan Hagar e nambutsug ey nemahhig hu tuka pemippihul nan Sarai.

⁵ Et kan Sarai nan Abram ey “Bahul mu hu tuwak kapemippihulin bega-en ku. Ma-nu tep in-abulut ku e i-ulig mu, nem neipalpun nambutsugan tu ey tuwak kapippihula. Hamban anhan ang-angen Apu Dios hedin hipan hi-gatan dewwa hu neiptek, hi-gam winu hi-gak.”

⁶ Kan Abram ey “Hi-gam hu kan bega-en ni hi-gatu et ngenamung hu pehding mun hi-gatu.” Et nemahhig hu kapehding Sarai nan Hagar et tuka panlelehhani et lektattuy bimmesik.

⁷ Entanni ey dinteng etan ni anghel Apu Dios hi Hagar etan di hebwak etan di eleg mebebleyi di gilig ni dalan ni mampellaw di Sur.

⁸ Kan nunman ni anghel ey “Hagar e bega-en Sarai, kele wada kadya? Attu nalpuam niya attu lawwam?” Kan Hagar ey “Bimmesikkak e hini-yan ku hi Sarai e kan bega-en ni hi-gak.”

⁹ Ey kan etan ni anghel ni hi-gatuy “Pambangngad kan hi-gatu et hi-gam hu mannenneng ni bega-en tu.

¹⁰ Iddawtan dakan dakel ni helag mu e eleg mebillang.

¹¹ Huttan ni imbutsug mu ey laki. Ya pangngeddan mullin hi-gatu ey Ismael tep dingngel Apu Dios hu nampehemmehemmekan mun hi-gatu.

¹² Huttan alin u-ungngam ey heni ma-lem ni kebayyu. Anggebe-hel tullin emin tuu ey anggebe-hel dalli dama. Ey eleg tulli pinhed ni mekibbebley idan agitu.”

¹³ Kan Hagar di nemnem tuy “Kaw makulug ni inang-ang ku hi Apu Dios, ey nanengtun mategu-ak et e-ehhelen kulli meippanggep ni nunya?” Et kantuy “Hi-gam hu Dios ni kamenang-ang-ang ni hi-gak.”

¹⁴ Et humman hu ya kapangngeddan idan tuu etan ni hebwak ey “Hebwak etan ni wadan ingganah ni kamenang-ang-ang ni hi-gak.” Humman ni hebwak ey wadad nambattanan ni Kades niya Bered.

¹⁵ Et iungngan Hagar etan u-ungnga dan Abram et ngadnan Abram ni hi Ismael.

¹⁶ Ya toon Abram ni nunman ey newalut enem.