Psalm 99 - Nan Hapit Apu Dios

Psalm 99 Hi Apu Dios Di Madayaw

¹ Hi Apu Dios ya hiyay patul an inumbun hi baktun nan numbattanan nan duwan kerubim. Ta hiya nan gumayonggongday tatagu ya umalyog tun luta an gapuh nan ongal an abalinana.

² Ta hiya an madayaw an Dios hi ad Zion di ap'apun di atagutaguh tun luta.

³ Ot hanat an namin ta'un tatagu ya dayawon ta'uh Apu Dios. Te hiya ya na'abbaktun Dios ya ma"id ha adi maphod i hiya.

⁴ Ya ongal di abalinana ya ongal di naminhodna hinadan maphod an ma'ma'at. Ya hiyay nangitudtudu hinadan maphod an pangat i dita'un tinanud Israel.

⁵ Ot hanat mundu"un ta'u ta dayawon ta'uh Apu Dios te ma"id nimpe ha adi maphod i hiya.

⁶ Handidan a'ammod ta'un da Moses ya hi Aaron ya imbilangna didah padina. Ya hi Samuel di ohah nadan nundasal i Apu Dios ya timbalnay dasalna.

⁷ Hi Apu Dios ya wadah nan bugut hidin himmapitanan dida ot unudonda nadan tuguna.

⁸ Ot he"a Apu Dios di nambal hi dasal nadan tatagum. Ta impa'innilam an pinakawanmuy bahulda mu wa'et mumbahulda on dusaom dida.

⁹ Madayaw hi Apu Dios. Ot eta'u ta eta'u dayawon hiya hidih nan nabillid an niyappit i hiya hi ad Jerusalem te ma''id nimpe ha adi maphod i hiya.