Psalm 92 - Nan Hapit Apu Dios

Psalm 92 Hay Mikantah Nan Habadun Tungo

¹ Mun'am'amlong ami an mangikankantah pundayawmi ya punhanaanmi i he"a Apu Dios an na'abbaktu.

² Ta amawmawi"it ya ahodohodom on ikankantami nan munnananong an pamhodmu ya nan a'atmu an adim ibahhoy imbagam hi atom.

³ Ta mungkankanta ami an idihhanmi an ipagangoh nan harp ya lira.

⁴ Mun'am'amlonga' Apu Dios an gapuh nadan inatmu ta hiya nan ikankanta' di pun'amlonga'.

⁵ Ya an namin nadan ato'atom Apu Dios ya ipa'innilanay anabaktum. Ya naligat an ma'awatan nan wah nomnommu.

⁶ Ot hanan tagun paddungnay ma''id ha nomnomna ya adina ma'awatan

⁷ an hanadan adi maphod di pangatda ya umatdah nan holo' an mangintuttubu te diday kumakaddangyan mu hay umudi ya madadagdah inggana.

⁸ Mu he''a Apu Dios ya mun'ap'apu'a hi ingga'inggana.

⁹ Ta ma"id ha bahhonan abakom nadan binuhulmu an adi maphod di pangatda ta miwakatda.

¹⁰ Mu ha"on'e Apu Dios ya indattana' hi bikah'u an umat hi bikah nadan ma'ilom an animal. Ya mun'am'amlonga' te winagahana'.

¹¹ Tinigo' di nangabakam hinadan binuhul'un adi maphod di pangatda ya dingngol'uy tukukdan ahililili.

¹² Hanadan umun'unud i Apu Dios ya pumhod di nitaguwanda ta umatdah nan kayiw an palma onu sedar hinadan billid an nungngadan hi Lebanon

¹³ an nitanom hinan way Templo an mangintuttubu.

¹⁴ Ta ta'on on mabayag ya mangimbubbungada ya mangintuttubuda ta umatdah nan pi'ittanom an munlangtay tubuda.

¹⁵ Ta hituwey ohan mangipatigo an hi Apu Dios ya nipto' di pangatna. Ya hiya nan umat hinan doplah an nahamad hi ihi"ugan ya ma"id ha alyon hi mihallay pangatna.