Psalm 87 - Nan Hapit Apu Dios

Psalm 87 Hay Naminhodan Apu Dios Hi Ad Jerusalem

¹ Hi Apu Dios di numpilih nan nangibangonanah nan ma'alih boblena hidih nadan nabillid an niyappit i hiya.

² Te hidih ad Zion di pinpinhodna hinadan boblen di tinanud Israel.

³ Ya dakol di mibaga hi amaphod diyen ma'alih boblen Apu Dios.

⁴ Ya alyon Apu Dios di, Iddum'u nadan i Egypt ya i Babilon hi pangitudo'a' hinadan umun'unud i ha"on ya ta'on on hanadan i Pilistia ya i Tael ya i Etiopia ta hiya nan wadaday ibilang'un dida hi i Jerusalem.

⁵ Te ha"on an na'abbaktun Dios ya pumbalino' hi ma"aphod an boble ta mundongol ta ahi way ohaon alyonay, Niyayyama' hi ad Jerusalem.

⁶ Ot hitun pangitudo'an Apu Dios hi ngadan nadan ibilangnah tataguna ya itudo'nan hidiy niyayyamanda.

⁷ Ta an naminda ya ma''amlongdan manayo ya mungkantadan alyonday, An namin di umipa'amlong i dita'u ya malpuh tun ad Zion.