Psalm 85 - Nan Hapit Apu Dios

Psalm 85 Hay Dasal Hi E Ipaphodan Di Boble

¹ Apu Dios, winagaham tun imbilangmuh boblem ta nibangngad nan kinadangyanmin tinanud Jacob.

² Ya pinakawan da'min tatagum hinadan numbahulanmi

³ te nabao nan nunhiglan bungotmun da'mi.

⁴ He"a an Dios an mangih'ihwang i da'mi hinadan punligatanmi, daan mo bahan ta boddangan da'mi ta umunud ami mon he"a. Ta wan adi'a bumohbohol i da'mi.

⁵ Te undan ahan tatawwa minaynayun di bungotmun da'mi ya ta'on on nadan tanudanmi.

⁶ Agammot bahan ta pabikahon da'mi bo ta wan dayawon da'a.

⁷ Ta ipatigom Apu Dios nan munnananong an pamhodmu ta wan ihwang da'mi hinan dusami an gapuh bahulmi.

⁸ Igongaha' nan ibagan Apu Dios te imbagana an palinggopon da'min tataguna hi'on idinongmi nadan adi maphod an ato'atonmi.

⁹ Ot innila' an ma"id ha bahhonan ihwangna nadan mangun'unud i hiya ta wan mipatigoy anabaktunah tun numboblayan ta'u.

¹⁰ Ot hitun a'atan datuwe ya ma'awatan di tatagu nan a'at di pamhodna ta mangun'unuddan hiya. Ta wan maphod mohpey pangatda ta wan luminggop di nitaguwanda.

¹¹ Hay tagu ya gahin ona inaynayun an mangun'unud i Apu Dios ya ahi minaynayun damdamay pangipapto'nan dida.

¹² Ta immannung an wagahan dita'un Apu Dios ta pumhod di itanom ta'u ta dumakol di apiton ta'u.

¹³ Hanan maphod an pangat di tatagu di paddungnay mangidadaan hi umaliyan Apu Dios.