Psalm 64 - Nan Hapit Apu Dios

Psalm 64 Hay Dasal Di Mumpaboddang Kantan David An Midat Hinan Mangipangpanguluh Kanta

¹ Apu Dios, donglom bahan tun dasal'u ta ihwanga' hinadan binuhul'u.

² Ta adim iyabulut an ma'at i ha"on nan ninomnom nadan adi maphod di pangatdan aton i ha"on.

³ Te matadom di panapitda an umat hinadan ispada onu pana.

⁴ Ya ta'on on ma"id ha bahul nan ohan tagu ya ma"id ha takutdan e manumtumbu' i hiya an ta'on on bokon immannung ta pa"ihonday nitaguwana.

⁵ Ya munhimboboddangda ta ma'at nan adi maphod an nunhahappitanandan aton. Ya alyonda bo udot di ta'on anuh onda atonhidi ot undan waha nanginnila i diyen at'attonda.

⁶ Ta nagibbuh'en hinahapitda on alyonday, Immannung an nala'ing ta'u te maphod hituwen nunhahapitan ta'u. Ya immannung an nunhiglay abalinan nadan tatagun munnomnom hi adi maphod hi atonda.

⁷ Mu palpaliwanda ya panaon Apu Dios dida ta mun'ahugatanda ya mun'a'ateday udum.

⁸ Ta diday a'atan nadan hinannapitda ta diday madadag. Ta hanada'en manigon dida ya munwigwigiwigda on nginihngihilanda dida.

⁹ Ta i diyen ma'at ya malmu mohpey takut di tatagu. Te masda'awda i diyen aton Apu Dios ya eda mohpe ibanagbaggah diyen inatna.

¹⁰ Mu hanadan mangun'unud i Apu Dios ya mundinoldan hiya. Ya diday mun'am'amlong an mundayaw i hiya.