Psalm 57 - Nan Hapit Apu Dios

Psalm 57 Kantan Di Mumpaboddang I Apu Dios Kantan David Hidin Inibtikanah Saul

¹ Hanat hom'ona' bahan Apu Dios te he''a han innila' hi paddungnay ihi"uga' an umata' hinan im'impah an mihi''ug hinan paya' inana ta inggana hi ume nan nunhiglan puwo'.

² Hi Apu Dios an na'abbaktuy pumpaboddanga' te hiya ya ipa'annungna nan ninomnomna tuwalin ma'at i ha"on.

³ Ot ta'on on wah ad abunyan ya donglonay dasal'u ta ihwanga' i hiya. Ya boddangana' ta ma'abak nadan binuhul'u ta mibabainda. Mu hi Apu Dios ya ipatigona nan munnananong an pamhodnan ha"on ya adina ibahhon aton nadan imbagana.

⁴ Lini''uba' tayyah binuhul'u an matadom di panapitda an umat hi ispada. Ya umatdah layon an mangan hi tagu an ay pahul ya papan di panay bobada.

⁵ Mu hanat mipatigo nan abalinam Apu Dios hi ad lagud ya hitun luta. Ta wan he"ay dayawon di tataguh tun luta.

⁶ Hanadan binuhul'u ya paddungnay binitbitday panawangdan ha''on ta hiya nan alyo' on mateya'. Ya nungka''utdah bitu ta pamitudan ha"on mu onnot on diday nabitu.

⁷ Ot madinola' i he''a Apu Dios ta hiya nan mabalin an ikankanta' di pundayaw'un he"a.

⁸ Ta hinan mun'awiwi"it an ta'on on agge ni' timmulu nan potang ya bumangona' ta ipagangoh'u nan harp ya lira.

⁹ Ya ikanta' di punhanaa' ya pundayaw'un he"a Apu Dios ta ipadngol'uh atagutaguh tun luta.

¹⁰ Te adi malukud nan ongal an pamhodmu i da'mi an umat hinan numbattanan tun luta ya ad lagud. Ya atbohdin ma"id ha pogpog nan pangipapto'mu i da'mi.

¹¹ Ot hanat mipatigo nan abalinam Apu Dios ta wan he"ay dayawon di atagutaguh tun luta.