Psalm 56 - Nan Hapit Apu Dios

Psalm 56 Hay Numpaboddangan David I Apu Dios

¹ Hom'ona' bahan Apu Dios te pamaag tayyah ona' pudupudugon hinadan binuhul'u ta nunhigla tayyan ona' maligligatan

² an adida umenglen mamudupudug i ha"on hi abigabigat yaden dakkodakkolda bo udot.

³ Mu hinan timpun tumakuta' ya mundinola' i Apu Dios an ongal di abalinana.

⁴ Ot dayawo' hi Apu Dios te madinola' hinan imbaganan ihwanga' i hiya. Ta hiya nan ma"id ha itakut'u te ma"id ha tagu hi abalinana an manadag i ha"on.

⁵ Hanadan mi'buhul i ha"on ya dakol di adida ipabahul i ha"on. Te numanonanomnomdah atondan manadag i ha''on.

⁶ Ya hahalipatana' ta eda mumbota' hinan pangipluya' ta way atondan mamaten ha"on.

⁷ Ot Apu Dios, hanat adim ibahhon dusaon dida. Ta ipatigom di bungotmun dida ta dadagom dida.

⁸ Innilam Apu Dios an namin di e' immukayungan ya innilam di dinakol di luwa' hinadan e' limmuwaluwaan. Ot innila' an intudo'mun namin datuwe.

⁹ Ya innila' Apu Dios an wadawada'a an mumpapto' i ha"on ta hiya nan mumpaboddanga"en he"a on munhunohunod nadan binuhul'u.

¹⁰ Dayawo' hi Apu Dios te madinola' hinadan adi mibahhon imbagana.

¹¹ Ya adiya' tumakut te hiyay pundinola' hi mangipapto' i ha"on ot ma"id ha tagu hi abalinanan manadag i ha''on.

¹² Ot pa'annungo' nan imbaga' hi i'nong'un he''a Apu Dios ta punhanaa' i he"a.

¹³ Te binanoddangana' i he''a ta nihwanga' hi ate. Ta hiya nan ituwen pi'taguwa' ya hanadan pohdom di unudo'.