Psalm 52 - Nan Hapit Apu Dios

Psalm 52 Kantan David

¹ He''a an nundongol an waday abalinana ya tanganunmu nayya ilattuwag nadan adi maphod an pangatmu. Umman hay panigon Apu Dios i he"a ya on'a umipabain.

² Te on hay atom an mamahbah hi ibbam an tagu di nun'onan hi nomnommu. Ta matadom di panapitmu ya na'la''ing'an mangap'apyah layah.

³ Te ha ahan di pohdom ya hanadan bumahbah an pangat an bokon hanadan maphod an pangat. Ya hanadan layah di impa'ingham an hapiton an bokon hanadan immannung.

⁴ Te he"an ma'layyah an tagu ya pun'amlongam an pahakitan di ibbam an tagu.

⁵ Mu hi Apu Dios ya adi mibahhon dadagon da'a ta taynam di nunhituwam ta wan mapogpog di pi'taguwam hitun luta.

⁶ Ta tigon'en nadan tatagun na'unud i Apu Dios hidiyen ma'at i he"a ya malmuy takutda ya ngumihildan alyonday,

⁷ Tigon ta'u'ey na'at i diyen tagu an bokon hi Apu Dios di nangidinolanah nitaguwana te hay nundinolana ya nadan kinadangyana. Ya kimmadangyan te nala'ing an kumuluk.

⁸ Mu ha''on'e ya ma'allinggopa' an umata' hinan kayiw an immongngal hidih nan way Templo. Te ongal di dinol'u hinan munnananong an pamhodmu Apu Dios.

⁹ Ta hiya nan ma''id ha pogpog di punhanaa' i he"a. Ya namamah nan a'am'amungan nadan ibba' an tatagum.