Psalm 47 - Nan Hapit Apu Dios

Psalm 47 Hi Apu Dios Ya Ammunay Ap'apuh Tun Luta

¹ An namin ta'un tinatagu ya dayawon ta'uh Apu Dios. Mumpalakpak ta'u ya olton ta'un mangikanta hi pundayaw ta'un hiya

² an na'abbaktun Dios te hiyay mun'ap'apu hi abobbobleh tun luta.

³ Hiyay nangdat hi abalinan ta'u ta hiya nan inabak ta'uy abobbobleh tun luta ot iyukodna i dita'u ta dita'uy mun'ap'apu i dida.

⁴ Ya hiya boy numpili hinan boblen indatnan dita'u an umipa'amlong i dita'un tinanud Jacob an na'appinhodnan tataguna.

⁵ Impa'abak Apu Dios i dita'u nadan nunhituhdi ot mumbangngad hi ad abunyan hidih nan way trononan mun'ap'apu yaden pun'itkuk nadan tataguy kantada ya pun'ipagangohday trampetada.

⁶ Ot ikankanta ta'uy pundayaw ta'un hiya an patul ta'u.

⁷ Te hiyay patul hitun luta. Ot hanat ikankanta ta'u nimpey pundayaw ta'un hiya an Dios

⁸ an wahdin inumbun hinan tronona an mun'ap'apu hi abobboble.

⁹ Ya nadan ap'apuh abobboble ya ma'amungda ta middumdan mundayawda i hiya an Dios an dinayaw din ammod ta'un hi Abraham. Ta hiyay madayaw te hiya an Dios di Patul di apatupatul.