Psalm 41 - Nan Hapit Apu Dios

Psalm 41 Dasal Han Mundogoh Intudo' David

¹ Mipa'amlong nan tagu an innilanan hummo' hinadan maligatan. Te boddangan damdaman Apu Dios hi'on waday punligatana.

² Ya ipapto'na ta mihwang hi ate. Ya wagahana ta mumbalin an hiyay matangad hinan numboblayana. Ya adina iyabulut an abakon nadan binuhulna.

³ Ya paphodon Apu Dios hi'on waday dogohna.

⁴ Ot umat i ha''on an alyo' di, Apu Dios, abuluto' an numbahula'. Mu daan mo bahan ta hom'ona' ya impaphoda'.

⁵ Hanada'en mi'buhul i ha''on ya nunhiglay pangalida ya aptuwanday ataya' ta wan ma''id anu ha uggan mabong'al hi ngadan'u.

⁶ Ya hanadan umalin mangidungon ha''on ya maphod di panapitda mu onnot on aggahda te onda umalin manigo hinadan adi maphod an ma'ma'at i ha''on. Ta waha eda tumtumbu'on hi udum.

⁷ Te an namin nadan humihiwon ha''on ya ahikukutyammanda an hihimlonday e' adadagan

⁸ an alyonday, Na'allotan nan doghona ot ma"id mahan mo aya ha alyon hi pumhod.

⁹ Ya ta'on bo on nan imbilang'uh nahamad an gayyum'u an wa'e ha ano' ya anonmin duwa ta ongal di dinol'un hiya mu onnot on mi'buhul i ha"on.

¹⁰ Ot hiya nan dawato' Apu Dios an hom'ona' ta paphodona' ta wan e' iballoh nadan ina'inatdan ha"on.

¹¹ Innila' Apu Dios an umipa'amlonga' i he"a te aggem inyabulut an abakona' hinadan binuhul'u.

¹² Ot innila' an gapu ta maphod di pangat'u ya banoddangana' i he''a te nanongnan wadawada'an ha"on.

¹³ Ot hi Apu Dios an dayawonmin tinanud Israel di madayaw hi ingga'inggana.