Psalm 24 - Nan Hapit Apu Dios

Psalm 24 Hi Apu Dios Di Na'abbaktun Patul

¹ An namin di wada an umat hitun luta ya tatagu ya nitanom ya nadan udum ya bagin Apu Dios.

² Te hiyay nunlumuh tun luta an hinan baybay di nangigopnadana.

³ Ot nganne udot di waday abalinana an umeh nan nabillid an niyappit i Apu Dios an awadan nan pundayawan i hiya?

⁴ Hay innila' hi mabalin an umehdi ya hanan maphod di punnomnomna ya pangatna ya hanan adi mundayaw hi udum an dios ya hanan adi munlayah.

⁵ Ya hiyay wagahan Apu Dios an mangih'ihwang i hiya. Ya ibilangna hiyah maphod.

⁶ Ta hiyay mabalin an mundayaw i Apu Dios an hiya nan dinayaw handin ammod ta'un hi Jacob.

⁷ Ot hanat pun'ibughulyu nadan geyt ya nadan panton nan pundayawan ta hunggop nan na'abbaktun Patul.

⁸ Mu nganney ngadan naen na'abbaktun Patul? Hiya nan ongal di abalinanan Patul te ma"id ha pa"abak i hiya.

⁹ Ot hanat pun'ibughulyu nimpe nadan geyt ya nadan panton nan pundayawan ta hunggop.

¹⁰ Te hiya nimpe nan ongal di abalinanan Patul.