Psalm 20 - Nan Hapit Apu Dios

Psalm 20 Hay Pumpaboddangan I Apu Dios Kantan David

¹ Hanat hi Apu Dios di bumoddang i he''a hi'on waday punligatam. Ya hanat hiya an dinayaw handin ammod ta'un hi Jacob di mangih'ihwang i he"a.

² Ya hanat hiya an ma'alin wahnan pundayawan hi ad Zion di mangipabikah i he''a.

³ Ya hanat umipa'amlong i hiya handidan inani'nongmu an ta'on on handidan naghob an ni'nong an ini'nongmun hiya.

⁴ Ya hanat aton Apu Dios nadan pohdom ahan an ma'at ta mipa'annung an namin nadan ninomnommun ma'at.

⁵ Ta wa'et nangabak'a on pun'itkukmiy pun'amlonganmi ya hay pangipabaktumi i Apu Dios. Ot maphod on tobalon Apu Dios nimpe an namin nadan dawatom i hiya.

⁶ Ad uwani ya innila' an hi Apu Dios ya ibaliwna nan pinto'nan mumpatul. Ta hinan awadanah ad abunyan ya tobalonay dasal nan patul ta dakol di pangabakana an gapuh nan ongal an abalinana an Dios.

⁷ Hanadan udum an tatagu ya pundinolanda nadan kalesadan e mi'gubat onu nadan kabayuda. Mu da'mi'e ya idinolmih nan ongal an abalinan Apu Dios.

⁸ Ot dadiyen adi mundinol i Apu Dios ya ma'abakda ta madadagda mu da'mi'e ya nanongnan mangabak ami.

⁹ Hanat donglom bahan Apu Dios tun dasalmi ta pangabakom nan patulmi.