Psalm 17 - Nan Hapit Apu Dios

Psalm 17 Hay Dasal Di Ohan Maphod Di Pangatna Dasal David

¹ Hanat boddangana' bahan Apu Dios ta maphod di ma'at i ha"on. Ot innilam an immannung tun ibaga' te ma''id ha uggan'u ibagah layah.

² Te he''ay nanginnilah nipto' ot hanat ipa'innilam an ma"id ha bahul'u.

³ Ya innilam hi'on nganney wah nomnom'u te ta'on on hinan hilong on panatnaona' i he"a. Ya innila' an ma''id ha inakhupam hi adi maphod hi a'at'u. Te minonomnom i ha''on an mahapul an ma"id ha hapito' hi gumalat hi pumbahula'.

⁴ Ya agge' inyunnudan hinan pangat nadan mabungot ya nadan adi maphod di pangatda. Te inyohha' an inunud nadan tugunmu.

⁵ Ta paddungnay inunud'u nan intuddum an awon ta agge' inhinghingngi.

⁶ Ot ad uwani ya he''a Apu Dios di pumpaboddanga' te innila' an tobalom di dasal'u. Ot hanat donglom bahan tun ibaga'.

⁷ Ta ipatigom nan ongal an pamhodmu. Te innila' an ibaliwmu nadan tatagu an paddungnay mihi''ug i he''a hi'on waday umalih binuhulda.

⁸ Ya hanat ipapto'a' bahan an umat hi pangipapto' di manu' hinan impahna an obobana.

⁹ Ta ihwanga' hinadan binuhul'u an nunli'ub i ha"on.

¹⁰ Te ma''id ha homo'da ya munlattuwagda bo udot an munhapihhapit.

¹¹ Ya an namin di umaya' on bobota'ona' i dida te pinhoddan patayona'.

¹² Ta umatdah nan na'a'aggangan an layon an numbota' ta wa'e ha dimpapna on nun'a'ana.

¹³ Ot agam bahan Apu Dios ta he"ay mi'hanggah nadan binuhul'u. Ot gapuh nan ongal an abalinam ya abakom dida.

¹⁴ Ta ihwanga' i dadiyen adi maphod di pangatda. Te on han nomnomnomonda ya nadan magamgaman hitun luta. Ot hanat dusaom dida ta holholtaponda nan lebbengnan dusada. Ya hanat ta'on on hanadan imbabaleda ya apapuda ya mi'inhoholtapda.

¹⁵ Mu ha''on'e ya innila' an gapuh pangun'unuda' i he"a ya ahi' pangigib'an an nunhiglay amlong'u te wadaa' hinah awadam.