Psalm 15 - Nan Hapit Apu Dios

Psalm 15 Nan Ma'abulut An Pundayaw I Apu Dios Kantan David

¹ Apu Dios, innila' an hay mabalin an hunggop hinan Templo an mundayaw i he"a hidih nan nabillid an niyappit i he"a

² ya hanadan mangun'unud hinadan tugunmu ya hanadan adi munlayah

³ ya hanadan ma"id ha ibagada onu atonda hi bumahbah hi ibbadan tagu ya adida e tumtumbu'on di ibbada.

⁴ Ya adida iyunnudan hinadan tatagu an adi mangunud hinadan tugunmu. Ya lispituwonda nadan mangun'unud i he"a. Ya an namin di ibagadah atonda ya atonda an ta'on on naligat.

⁵ Ya adida ipapulsintuy ipa'utangda. Ya adida mapihhuwan ta tistiguwanday layah ta mapaligat nadan ma"id ha bahulda. Ot nan tagun athinay a'atna ya nahamad di pi'taguwana i Apu Dios.