Psalm 149 - Nan Hapit Apu Dios

Psalm 149 Hay Pundayaw I Apu Dios

¹ Madayaw hi Apu Dios. Hanat ikantaan ta'uh Apu Dios hi balun kanta hi pundayaw ta'un hiya hinan a'am'amungan ta'un mangun'unud i hiya.

² Ta mun'am'amlong ta'un tinanud Israel hinan nunlumu i dita'u. Namama i da'yun nunhituh ad Zion an hanat mun'am'amlong ayuh nan balun patulyu.

³ Ya hanat manayo ta'u ya usalon ta'u nadan harp ya tamburin an mundayaw i Apu Dios.

⁴ Te dita'un tatagunay mangipa'amlong i hiya. Ya boddangana nadan mumpada"ul ta abakonda nadan binuhulda.

⁵ Ot da'yun i'iba an mangun'unud i Apu Dios, hanat mun'am'amlong ayu hi nangabakanyu. Ta ta'on on hinan hilong an wada ayuh nan alo'anyu ya mungkankanta ayuh amlongyu.

⁶ Ya hanat ikankantayuy pundayawyun hiya an ta'on on pingngolyuy ispadayu.

⁷ Ta eyu gubaton di abobboble ta pun'abakyu dida ya dinusayu nadan tataguhdi.

⁸ Ta tiliwonyu nadan patulda ya a'ap'apuda ya numbangkilinganyu dida

⁹ ta madusada nimpe an miyunnudan hinan imbagan Apu Dios an dusada. Ya i dadiye damdamay ipabaktuwan nadan mangun'unud i hiya. Madayaw hi Apu Dios.