Psalm 141 - Nan Hapit Apu Dios

Psalm 141 Hay Dasal David I Han Mun'ahdom

¹ Hanat donglom bahan Apu Dios di dasal'u. Ta mi'baga'a an umalin mamoddang i ha"on.

² Ya hanat tun pangitaggeya' hi ta'le' an mundasal ya ibilangmun umat hinan niyappit an insenso onu umat hinan miyappit hi abigabigat hinan mun'ahdom.

³ Ot hay dawato' ya adim bahan iyabulut an waha hapito' hi adi maphod hi gumalat hi pumbahula'.

⁴ Ya hanat boddangana' ta adi' nomnomon an mangat hi adi maphod ya adiya' ma'ma'yat hinadan at'atton nadan tatagun mangmangngat hi pumbahulan. Ya ta wan adiya' e mi'yamu''amung ya mi'mi''an i dida.

⁵ Hanan paningal nan maphod di pangatnan tagu ya abuluto' te iphoda'. Mu hanada'en adi maphod di pangatda ya on'uwot idasadasalan dida.

⁶ Ta hitun pundusaam hinadan a'ap'apuda ta mipadokpahdah nan doplah ya ahida mohpe patiyon nadan ibaga'.

⁷ Ta ahida mohpe alyon di, Hanadan adi maphod di pangatda ya adi milubu' di adolda ta pamaag ya awakilat nadan tungalda ta umatdah nadan niwakat an batuh nan na'aladun luta.

⁸ Mu ha''on'e ya he''an na'abbaktun Dios di nanongnah pundinola' hi ihi"uga'. Ot hanat adim iyabulut an patayona'.

⁹ Ya hanat ihwanga' hinadan pamalbalin nadan tatagu an adi maphod di pangatda an paddungnay nungka''utdah bituh agaha'.

¹⁰ Mu hanat diday a'atan dadiyen ninomnomda an pamalbali i ha"on ta wan ha"on di mihwang.