Psalm 137 - Nan Hapit Apu Dios

Psalm 137 Hay Kantan Di Ohan Ni'adawwih Boblena

¹ Di'et um'umbun amih nan pingngit nadan wangwang hi ad Babilon ya kumga ami hi'on nanginomnomanmi nan nadadag an boblemih ad Zion.

² Ta inhablemi nadan harpmih nan hapang te indinongmi mon mangipagangoh i dadiye.

³ Te wa'e on alyon nadan binuhulmi an nangibalud i da'mi di ikantaanmi dida hinadan ugganmi ikantah ad Zion.

⁴ Mu nganney atonmin mangikanta hi pundayawmin Apu Dios yaden wahdi ami i diyen nat'on an boble?

⁵ Hi'on linglingonmi nan boblemih ad Jerusalem ya hanat adi iyabulut Apu Dios an ipagangohmi dadiyen harpmih inggana.

⁶ Ya onha linglingonmi nimpeh ad Jerusalem ta bokon hidiy na'anhan hi mangipa'amlong i da'mi ot ta'on attog hi adi ami uggan mungkanta.

⁷ Hanat adim linglingon Apu Dios nan inat nadan i Edom hi nangabakan nadan i Babilon i da'min i Jerusalem. Te analyonday, Hanat pa'dadaggonyuh naen boble ta ma"id ha adi madadag.

⁸ Mu da'yu'en i Babilon ya ahi da'yu damdama dadagon. Ta mun'am'amlong nadan ahi mangiballoh hinan inatyun da'mi.

⁹ Ta pun'alada nadan goggolang an i'imbabaleyu on nun'ipuhitda didah nadan batu.