Psalm 136 - Nan Hapit Apu Dios

Psalm 136 Hay Pangipapto' Apu Dios Hinadan Tataguna

¹ Munhana ta'un Apu Dios te hiya ya maphod di pangatna ya munnananong nan pamhodna.

² Ot munhana ta'u hinan ma"id ha nipadunganan Dios te munnananong nimpey pamhodna.

³ Ot munhana ta'u nimpe i Apu Dios an ap'apun an namin di ap'apu te munnananong nimpey pamhodna.

⁴ Hiya ya ammunay waday abalinana an mangat hi nakaskasda'aw ya munnananong nimpey pamhodna.

⁵ Impatigonay la'ingna hi nunlumuwanah ad lagud ya munnananong nimpey pamhodna.

⁶ Ya hiyay nangigopnad hitun lutah nan tu'yap di liting ya munnananong nimpey pamhodna.

⁷ Ya hiyay nunlumu hi algo ya bulan ya munnananong nimpey pamhodna.

⁸ Ta nan algo ya dumilag hinan mapatal te munnananong nan pamhodna.

⁹ Ya limmuna nan bulan ya nadan bittuwon ta diday dumilag hinan mahdom te munnananong nimpey pamhodna.

¹⁰ Hiyay namateh nadan panguluwan an linala'in imbabalen nadan i Egypt mu munnananong nimpey pamhodna.

¹¹ Ya hiyay nangipangulu i handidan a'ammod ta'un tinanud Israel ta tinaynandah ad Egypt te munnananong nimpey pamhodna.

¹² Ot gapuh nan ongal an abalinana ya impanguluna nimpe handidan a'ammod ta'uh nanaynandah ad Egypt te munnananong nimpey pamhodna.

¹³ Ya nunhi"anona nan liting hidin nipotto'dah nan baybay an mumbolah ot pumbalinonah mamaga nan gawwana te munnananong nimpey pamhodna.

¹⁴ Ta nangi'wan handidan a'ammod ta'un tinanud Israel an immagwat te munnananong nimpey pamhodna.

¹⁵ Mu hana'en patul hi ad Egypt an didah nadan tindaluna ya nun'a'altingda i diyen baybay an mumbolah. Mu munnananong nan pamhod Apu Dios.

¹⁶ Ot ipanguluna nadan tatagunah nan agge naboblayan te munnananong nimpey pamhodna.

¹⁷ Ya numpatena nadan ongal di abalinandan papatul mu munnananong nimpey pamhodna.

¹⁸ Ta numpatena nadan nundongol an papatul mu munnananong nan pamhodna.

¹⁹ Ta pinatena nan patul an hi Sihon an patul nadan tinanud Amor mu munnananong nan pamhodna.

²⁰ Ya atbohdin pinatenah Og an patul hi ad Basan mu munnananong nimpey pamhodna.

²¹ Ta nadan boblen dadiyen pinatena ya indatnah nadan tataguna te munnananong nimpey pamhodna.

²² Ta handidan a'ammod ta'u nimpen tinanud Israel an munhilbin hiyay nangdatana te munnananong nimpey pamhodna.

²³ Hi Apu Dios ya agge dita'u ingnganuy hidin na'abakan ta'u te munnananong nimpey pamhodna.

²⁴ Te inihwang dita'u hinadan binuhul ta'u te munnananong nimpey pamhodna.

²⁵ Ya hiyay mangdat hi itanud nadan limmuna te munnananong nimpey pamhodna.

²⁶ Ta hiya nan munhana ta'u i Apu Dios hi ad abunyan te munnananong nimpey pamhodna.