Psalm 129 - Nan Hapit Apu Dios

Psalm 129 Hay Dasal Nadan Tinanud Israel Ta Wan Dusaon Apu Dios Nadan Binuhulda

¹ Dita'un tinanud Israel ya nunhiglay napaligatan ta'u an nihipun hi immaliyan handidan a'ammod ta'uhtu.

² Mu ta'on on nunhiglay namalpaligat nadan binuhul ta'u i dita'u an nihipun hidin hopapna ya agge dita'u inabak

³ an ta'on on paddungnay inaladuday bonog ta'u.

⁴ Mu hi Apu Dios an nipto' di pangatna ya pinogpognay e pamalpaligatan nadan tatagun adi maphod di pangatda i dita'u.

⁵ Ot hanat ma'abakdah gubat ta mibabain nadan ma'hihhiwoh tun ad Jerusalem.

⁶ Ya hanat umatdah nadan holo' an himmangoh nan atop an adi madne ya maklingdat mateda.

⁷ Ta umatda boh nan ma"id ha iyatana an adi wingiyon nadan munggapas.

⁸ Ya hanat ma''id hinadan mala''uh ha mangalih hanat wagahan da'yun Apu Dios.