Psalm 12 - Nan Hapit Apu Dios

Psalm 12 Hay Dasal Di Mumpaboddang

¹ Apu Dios, daan mo bahan ta boddangan da'mi te tuwe mon mun'ama"id nadan mangun'unud i he"a. Ya ma"id mo ha ta'on hi oha hi mabalin an pundinolan.

² Te munhin'a'ambunda. Ya manu te maphod di panpannapitda mu dee mannot an aggahda.

³ Ot daan mot he''ay mangupup hi to'oda ta way atondan duminong an munlattuwag.

⁴ Te madinolda an gapuh panapitda ya mabalin an alanda nadan gagamgamanda. Ya hay punnomnomda ya ma"id ha mabalin hi mangipadinong i diyen at'attonda.

⁵ Mu alyon Apu Dios di, Tinigo' di na'na'at hinadan nun'awotwot. Ya dingngol'uy pumpahmo'an nadan tatagun napaligat hi nangat nadan tatagun adi maphod di pangatda i dida. Ta hiya nan ad uwani ya ihwang'u dida te hituwey hihimlondah ma'at.

⁶ Mapmaphod hinaen hapit Apu Dios te nan hapitna ya umat i ha namahmah an silber an numpipitun nilutu.

⁷ Ot he''a Apu Dios di dinlonmi hi mangipapto' i da'mi ta mihwang amih inggana hinan pangat nadan tatagun adi maphod di pangatda.

⁸ Te ta'on on idanay umayanmi on dedahdi. Ya pemanan bo udot di tatagu dadiyen at'attonda.