Psalm 114 - Nan Hapit Apu Dios

Psalm 114 Hay Nakakan Nadan Tinanud Israel Hi Ad Egypt

¹ Hidin immaan nadan tinanud Israel an hi Jacob di ohah ngadana hi ad Egypt an bokonda numboblayan

² ya numbalinona didah niyappit i hiya ta diday tataguna ya hiyay Ap'apuda.

³ Ya hidin numpatigoh Apu Dios hidih nan baybay an mumbolah ya nunhi"an nan liting. Ya atbohdiy na'at hinan liting hinan wangwang an nungngadan hi Jordan.

⁴ Ya niwagot nadan billid ta umatdah nan mumpaypaytu"an an gulding onu kalnero.

⁵ He"an baybay, Tanganu on'a namaganan? Da'yun liting hinan baybay, tanganu on ayu mamtik? Ya ta'on on da'yun liting hinan wangwang, tanganu on ayu adi mange?

⁶ Ya ta'on on da'yun billid ya da'yun nabillid ya tanganu on ayu mumpaytu"an an umat hinadan gulding onu kalnero?

⁷ Hantun luta ya ahi miwagot ta paddungnay gumayonggong hitun pumbangngadan Apu Dios an dinayaw handin ammod ta'un hi Jacob

⁸ an hiya din nangipabudduh hi liting hinan doplah ta na'apyahdi han puhung.