Psalm 101 - Nan Hapit Apu Dios

Psalm 101 Kantan David

¹ Ikankanta' di pundayaw'un he"a Apu Dios ya ikankanta' nan ongal an pamhodmu ya nan nipto' an pangatmu.

² Ot hanat boddangana' bahan Apu Dios an mangat hinadan nipto' ta wan ma"id ha mibahhoh ato' ta ta'on on hinan pun'ap'apuwa' ya maphod di ato' an mun'ap'apu.

³ Ta adiya' ma'ma'yat hinadan at'aton nadan adi maphod di pangatda an adi da'a unudon.

⁴ Ya halipodpodo' ta adiya' ma'ma'yat hinadan mangmangngat hi kuluk onu kumpulnan adi maphod.

⁵ Ya wa'e ha manumtumbu' hi hinaggona ya pogpogo' di nitaguwana. Ya atbohdiy ato' hinadan mumpungngohe ya mumpunlattuwag.

⁶ Ot hay abuluto' hi mi'tamun ha"on ta uggan'u pummahmahan hi maphod hi ato' ya an namindan munhilbin ha"on hinan palasyu ya hanadan waday pangihakitdah tun boble ya nadan mabalin an pundinolan.

⁷ Te adi mabalin an waha mi'hitun ha"on hinadan kumukuluk ya ma'layyah.

⁸ Ya abigabigat hinan mawmawi"it ya dadago' nadan mangmangngat hi adi maphod. Ta mapogpog nadan adi maphod an ma'ma'at ituwen ma'alih boblen Apu Dios.