Nehemiah 7 - Nan Hapit Apu Dios

¹ Hidin nalpah an nipaphod nadan binattun alad ya nadan geyt ya nadan dakigda ot piliyo' mohpe nadan mungguwalya ya nadan mangipangpanguluh nan pungkantaan hinan pundayawan an tinanud Libay ta way ohaon nidattan hi tamuna.

² Ot iyukod'u i ibba' an hi Hanani ya nan ap'apun nadan guwalya an hi Hananiah tun boblemih ad Jerusalem ta diday mumpapto'. Manu'eh pinili' hi Hananiah ya hiya han mabalin an pundinolan ya ma''id ha udum hi umat i hiya an hi Apu Dios di un'unudona.

³ Ot alyo' i dida di, Hanat tigonyu ta ingganah on ma'aggawa ya ahi mibughul hanadan geyt tun numboblayan ta'u. Ya ibagayuh nadan mumpungguwalyah nadan geyt ta ihamaddan idakig nadan geyt on ahida umanamut hinan mun'ahdom. Ya hanat manigo ayuh tudan i Jerusalem hi mungguwalya ta mungguwalyaday udum hinadan natuddun pungguwalyaan ya nada'en udum ya hi way potto' di numpunhituwanda.

⁴ Hantun bobleh ad Jerusalem ya abillog mu oh'ohhay nunhituhtu ya oh'ohha ni' di babaleh niphod.

⁵ Ta hiya nan impanomnom Apu Dios i ha''on an amungo' nadan ap'apu ya nadan munhilbin dida ya nadan tatagu ta way ohaon intudo'day ngadandan himpahimpamu'un. Indani ya hinama''u han nitudo'an di ngadan nadan namangulun nalpuh ad Babilon an immanamut hitun ad Judah.

⁶ Ta datuwey nitudo' an ngadan nadan immanamut an ibbamin tinanud Israel an inyen din patul an hi Nebukadnesar hi ad Babilon. Ya hidin immanamutanda ya way ohaon immeh nadan numpumboblayanda tuwalih tun ad Jerusalem ya hinadan udum an bobleh tun ad Judah.

⁷ Ya hay nangipangulu i dida hi immanamutanda ya da Serubbabel ya hi Jesua ya han hi Nehemiah ya hi Asariah ya hi Raamiah ya hi Nahamani ya hi Mordekay ya hi Bilsan ya hi Misperet ya hi Bigbay ya hi Nehum ya hi Baanah. Datuwey bilang nadan himpahimpamu'un an tinanud Israel an immanamut.

Hay Bilang Nadan Immanamut Hi Ad Judah An Nalpuh Ad Babilon

⁸ Hay immanamut hinan holag Paros ya duway libu ta han hinggahut ta napitut duwa (2,172)

⁹ ya hinan holag'en Sepatiah ya tuluy gahut ta han napitut duwa (372)

¹⁰ ya hi Arah e ya onom di gahut ta nabonglet duwa (652).

¹¹ Ya hinan holag'en Pahat-Moab an nalpuh nan tinanud Jesua ya tinanud Joab ya duway libu ta han waluy gahut ta han himpulut waluy (2,818) bilangda

¹² ya hi Elam e ya hinlibu ta han duway gahut ta nabonglet opat (1,254) di bilangda

¹³ ya hi Sattu e ya waluy gahut ta han napat ta limay (845) bilangda

¹⁴ ya hi Sakkay e ya pituy gahut ta han nanom (760) di bilangda

¹⁵ ya hi Binnuy e ya onom di gahut ta napat ta waluy (648) bilangda

¹⁶ ya hi Bebay e ya onom di gahut ta baintit waluy (628) bilangda

¹⁷ ya hi Asgad e ya duway libu ta han tuluy gahut ta baintit duway (2,322) bilangda

¹⁸ ya hi Adonikam e ya onom di gahut ta han nanom ta pituy (667) bilangda

¹⁹ ya hi Bigbay e ya duway libu ta han nanom ta pituy (2,067) bilangda

²⁰ ya hi Adin e ya onom di gahut ta han nabonglet limay (655) bilangda

²¹ ya hi Ater e an holag Hesekiah ya nahiyam ta waluy (98) bilangda

²² ya hi Hasum e ya tuluy gahut ta baintit waluy (328) bilangda

²³ ya hi Besay e ya tuluy gahut ta baintit opat (324) di bilangda

²⁴ ya hi Harip e ya hinggahut ta han himpulut duway (112) bilangda

²⁵ ya hi Gibeon e ya nahiyam ta limay (95) bilangda.

Hay Bilang Nadan Immanamut Hinadan Numpumboblayanda Tuwali

²⁶ Hanada'en i Bethlehem ya i Netopah ya hinggahut ta han nawalut waluy (188) bilangda

²⁷ ya nada'en i Anatot ya hinggahut ta han baintit waluy (128) bilangda

²⁸ ya nada'en i Asmabet ya napat ta duway (42) bilangda

²⁹ ya nada'en i Kiriat-Jearim ya i Kepirah ya i Beerot ya pituy gahut ta han napat ta tuluy (743) bilangda

³⁰ ya nada'en i Ramah ya i Geba ya onom di gahut ta baintit ohay (621) bilangda

³¹ ya nada'en i Mikmas ya hinggahut ta baintit duway (122) bilangda

³² ya nada'en i Betel ya i Ay ya hinggahut ta baintit tuluy (123) bilangda

³³ ya nada'en i Nebo ya nabonglet duway (52) bilangda

³⁴ ya nada'en nalpuh ad Elam ya hinlibu ta han duway gahut ta nabonglet opat (1,254) di bilangda

³⁵ ya nada'en i Harim ya tuluy gahut ta baintiy (320) bilangda

³⁶ ya nada'en i Jeriko ya tuluy gahut ta napat ta limay (345) bilangda

³⁷ ya nada'en nalpuh ad Lod ya hi ad Hadid ya hi ad Ono ya pituy gahut ta baintit ohay (721) bilangda

³⁸ ya nada'en i Senaah ya tuluy libu ta han hiyam di gahut ta tulumpuluy (3,930) bilangda.

Hay Bilang Di Holag Nadan Padi

³⁹ Datuwe damdama nadan padi an immanamut. Hanada'en holag Jedayah an tinanudan Jesua ya hiyam di gahut ta napitut tuluy (973) bilangda

⁴⁰ ya hi Immer e ya hinlibu ta han nabonglet duway (1,052) bilangda.

⁴¹ Ya nada'en holag Pasur ya hinlibu ta han duway gahut ta napat ta pituy (1,247) bilangda

⁴² ya hi Harim e ya hinlibu ta han himpulut pituy (1,017) bilangda.

⁴³ Ya hanada'en udum an ibbadan tinanud Libay an holag Jesua ya hay immanamut i dida ya nadan holag Kadmiel an tinanudan Hodabiah an napitut opatda (74).

⁴⁴ Ya hanada'en mangipangpanguluh kanta an holag Asap ya hinggahut ta napat ta waluda (148).

⁴⁵ Ya hanada'en mungguwalyah nadan geyt an holag Sallum ya holag Ater ya holag Talmon ya holag Akkub ya holag Hatita ya holag Sobay ya hinggahut ta tulumpulut waluda (138).

⁴⁶ Ya hanada'en udum an muntamuh nan Templo an immanamut ya nadan holag Siha ya holag Hasupa ya holag Tabbaot

⁴⁷ ya holag Keros ya holag Sia ya holag Padon

⁴⁸ ya holag Lebana ya holag Hagaba ya holag Salmay

⁴⁹ ya holag Hanan ya holag Giddel ya holag Gahar

⁵⁰ ya holag Reayah ya holag Resin ya holag Nekoda

⁵¹ ya holag Gassam ya holag Ussa ya holag Paseah

⁵² ya holag Besay ya holag Meunim ya holag Nepussim

⁵³ ya holag Bakbuk ya holag Hakupa ya holag Harur

⁵⁴ ya holag Baslut ya holag Mehida ya holag Harsa

⁵⁵ ya holag Barkos ya holag Sisera ya holag Temah

⁵⁶ ya holag Nesiah ya holag Hatipa.

⁵⁷ Ya hanada'en holag nadan baal Solomon ya nadan holag Sotay ya holag Soperet ya holag Perida

⁵⁸ ya holag Jaala ya holag Darkon ya holag Giddel

⁵⁹ ya holag Sepatiah ya holag Hattil ya holag Pokeret-Hasebaim ya holag Amon.

⁶⁰ Ta hay ngammut di bilang an namin nadan immanamut an holag nadan muntamuh nan Templo ya nadan holag nadan baal Solomon ya tuluy gahut ta han nahiyam ta duwa (392).

⁶¹ Ya wadada boy ibbadan immanamut an nalpuh ad Tel-Melah ya hi ad Tel-Harsa ya hi ad Kerub ya hi ad Addon ya hi ad Immer hidih ad Babilon. Mu ma"id ha tontonondah nalpuwan di a'ammodda ta panginnilaan hi'on nalpudah nadan tinanud Israel.

⁶² Ta hina'e an holag Delayah ya holag Tobiah ya holag Nekoda ya onom di gahut ta napat ta duwa (642) di ngammutda.

⁶³ Ya wadada boy ibbadan padi an holag da Hobayah ya holag Hakkos ya holag Barsillay. Hituwen hi Barsillay ya inahawana nan imbabalen han hi Barsillay an i Gilead ot pamaaggot ngadanandah hi Barsillay an ngadan aman ahawana.

⁶⁴ Mu hidin hama'onday nitudo'an di tonton di nalpuwan di a'ammodda ya ma"id. Ta hiya nan aggeda mo inabulut an middumda hinadan padi.

⁶⁵ Ot alyon mon nan gobelnador i dida hi adi mabalin an mi"anda hinadan midawat i Apu Dios an ingganah on waha padi hi mangiyusal hinan Urim ya Tummim.

⁶⁶ Ta hay bilangdan naminamin an immanamut ya napat ta duway libu ta han tuluy gahut ta nanom (42,360).

⁶⁷ Ya nat'on bo nadan linala'i ya binabai an baalda an pituy libu ta han tuluy gahut ta tulumpulut pitu (7,337). Ya wadada boy duway gahut ta napat ta lima (245) an linala'i ya binabai an mangipangpanguluh kanta hinan pundayawan.

⁶⁸ Ya hay bilang di kabayuda ya pituy gahut ta tulumpulut onom (736) ya nat'on bo nadan mul an duway gahut ta napat ta lima (245).

⁶⁹ Ya hay bilang'en di kemelda ya opat di gahut ta tulumpulut lima (435) ya onom di libu ta han pituy gahut ta bainti (6,720) di dongkida.

Hay Inatdan Nangipaphod Hinan Templo

⁷⁰ Hanadan ap'apun nadan himpahimpamu'un ya dakol i diday nangdat hi iboddangdah nan ipaphodan nan Templo. Ya nan gobelnador ya nangdat hi mahuluk hi waluy kilun balitu' ya nabonglen (50) malukung ya limay gahut ta tulumpulu (530) an lubung di padi.

⁷¹ Ya hay indat'en dadiyen ap'apun nadan himpahimpamu'un ya umeh hinggahut ta napituy (170) kilun balitu' ya hinlibu ta han opat di gahut ta nanom ta oha (1,461) di kilun silber.

⁷² Ya hay indat nadan udum an tatagu ya umeh hinggahut ta han napituy (170) kilun di balitu' ya hinlibu ta han tuluy gahut ta baintit hiyam (1,329) di kilun silber ya nanom ta pitu (67) an lubung di padi.

⁷³ Ya nadan padi ya nadan ibbadan tinanud Libay an mungguwalyah nadan geyt ya nadan mangipangpanguluh kantah nan pundayawan ya nadan mumpuntamuh nan Templo ya nadan udum an tinanud Israel ya eda numpunhituh nadan numboblayanda tuwalih ad Judah. Ta hidin mi'apituh bulan ya an naminda an tinanud Israel ya wahdida moh nadan numpumboblayanda tuwali.