Jeremiah 45 - Nan Hapit Apu Dios

Hay Pangihwangan Apu Dios I Baruk

¹ Hidi ta'wa an mi'apat hi tawon hi numpatulan Jehoyakim an imbabalen Josiah hi ad Judah ya nalpah an intudo' Baruk an namin nan imbaga' hi itudo'na

² ya waday imbagan Apu Dios hi ibaga' i Baruk

³ an alyonay, Nunlili'a Baruk an alyom di, Ngalngalam bo tayyay aton Apu Dios i ha"on ta inudmana nan nunnaud an e' inomnoman. Ta immengleya' mo tayyah nitaguwa'.

⁴ Mu ha"on an Dios ya ibaga' i he"a Baruk an dadago' hituwen boblen imbangon'u ta paddungnay intanom'u ot ahi' ba'guton.

⁵ Ot ma"id ha odamom hi em pumhodan. Mu ihwang da'a damdamah dumadag an ta'on on idanay umayam. Ha"on an Dios di mangalin tuwe.