Taitọs 3 - Ibani New Testament

Krais Ọḅụduaapụ Duma Kọọ Bẹ Ḅara

¹ Pa mininiapụ biekóróma ḅẹ́ nnị ḅụ sitéréma táarịapụ na sịbịdaapụ pịrị, ḅẹ́ nnị n bịpị pughu, n pịghị tẹ́lẹ́ma sị ibifịrị nwángị asọ kịrịkị́rị́ ḅụ.

² Dugho n pịrị ḅẹ́ nnị gbẹ́rẹ́ḅọ sọ dughosima ma, kụ́ma diin dọghụ, nangwọ mịẹ, pịghị ḅụ́sitéréma ḅara pa kị́nị́mamgba na ngaa.

³ Wamịnị sọ gbẹ́rẹ́sa biri pịghị oḅorisọm, bịpị osigha, nnị wa daa asọ irima. Wa pịghị omoni sọ wámịna ojumẹnị binyẹ gonyẹ́ gonyẹ́ pịrịm. Wa pịghị wámịna duma kọarị sisịbịbie sua ḅụ, jughonyemọni, jẹapụ imi wa ḅẹ́lẹ́maghaapụ, wamịnị sọ n ḅẹlẹmagha.

⁴ Kụ́ma Tamuno wámịna ḅọ́rọ́maḅọ ori ibi tẹ́mẹ́ na ori ḅẹlẹma pa wa die sa,

⁵ ọ wa duaḅọ́rọ́mam, ḅẹgha ḅẹ́ wa mịẹ ọ pịrị ibinyẹ gosi kụ́ma ori lolomakúkúbie ḅụ ḅọ́rọ́ ọ wa ḅọ́rọ́mam. Ọ wa duaḅọ́rọ́mam Tọ́ntọ́ Tẹ́mẹ́ ma ḅụ ḅọ́rọ́, sii ḅụ wa sịrị siḅọ sị ịwọma wa yii na pịghị ịwọ duma pa wa pịrị.

⁶ Tamuno Jizọs Krais ḅụ ḅọ́rọ́ ori Tọ́ntọ́ Tẹ́mẹ́ ma pa bifụfụụ́ ḅara ḅụ wa pịrịm,

⁷ sị ori tọ́rụ́kụrụkụ́rụ́ ḅụ ḅọ́rọ́ wa karakárá ibiamịẹnyẹapụ sọ́bẹm Tamuno ma fịnị angaá, sị ḅo wa tọ́rụ́dighi gbámásó duma ma nyáná.

⁸ Mịị karakárá dughonyẹ, a bim ḅẹ́ ọmịnị anị dugho, anị dugho ḅarị, sị Tamuno ma ḅụ mininimáapụ nimi bẹ ḅara sị nnị nna sa fama ibifịrị nwángị bẹ ḅara. Mịnanyẹ ma opuma ibim, anị pịghị sọ́nyẹ sọ kị́nị́mamgba pịrịbẹm.

⁹ Kụ́ma mịẹnyẹ ḅụ ofori nụ́nányẹ kile, n gịẹ kóróma nangwọ tádọ́apụ ẹrẹ, ólóghó ma gboloma kam na owu na, mịnanyẹ ma sọnyẹ ḅụ ofori pịghị fịrị ḅụ ofori.

¹⁰ Puama dighiarịapụ ma, n birinụ́nụ́, pịghị jẹ́ pa nna birinụ́nụ́, anịma ḅọ́rọ́ sa mịnị nnị na gbẹ́rẹ́ mịẹnyẹ sọ nyána ma.

¹¹ Ị nimim ḅẹ́ mịnaapụ ma n nimim sị n mịẹarị siiamịẹnyẹ ma mịẹarị, nna si ma pịghị diearị ḅẹ́ nnị irimamam.

Kunema Againma

¹² A Atemas anịgha Tisikọs pa ọ fịrịma gbẹ́rẹ́kiri, ọmịnị ọmịna ịnyọ la ḅara mịẹsị ḅoo i nana dona Nikopolis ḅụ tegó mịị a bii ngaa a fịnị mịị oḅuu sáá.

¹³ Ị́yẹ́ ịnyọ la ḅara mịẹsị, Zenas ologho kiẹḅọ ma na Apọlọs fịrịma nna Muunyẹ ḅụ, árị ḅẹ́ gbẹ́rẹ́nyẹ sọ npalịmagha.

¹⁴ Wámịna mịnaapụ Krete ḅụ fịnị mininiapụ ma ibifịrị nwángị ma pa nna mịẹmịẹnyẹ mịẹ, nnị ine éné éné ḅụ npalịma nyẹ nyáná nna ḅụ pịrịbẹ ḅara. Nnị sọ́nyẹ bie ofori duma kọọma.

¹⁵ I nana mịnga fịnịapụ mamgba fịrịmam ḅẹ́ a o bii, pịghị wámịna nángwọ́apụ minini ma ḅụ fịnịapụ ma bii. Tamuno tọ́rụ́kụrụkụ́rụ́ ọmịnị kị́nị́mamgba na fịnịị.