Romapụ 7 - Ibani New Testament

Yaa Gboloma Ólóghó Ma

¹ Ịyẹa amịnáapụ, a dugho dọghụnyẹ ma ọmịnị akanyaḅobẹm tegó ọmịnị ólóghó ma nimim, ḅẹ́ ólóghó ma kụ́rọ nyánam tumḅọ dumafịnị sa gonyẹ́ gonyẹ́.

² Pa tọ́ma ḅụ, ólóghó ma deeyaa ọ́rụ́ḅọ pa a dee ḅụ kpọm, o dumafịnị sa gonyẹ́ gonyẹ́, kụ́ma ọ fịị n ḅẹḅẹ n pa nnị mmẹapụ fịna ólóghó ma ḅụ nnị a fiimamam.

³ Anịsáa a mú jẹ́ owiḅọ na fịnịfịnị, deḅọ ma pa dumafịnị sa, nnị amadọghụḅọ pa a sịbẹm; kụ́ma ḅọ́rọ́ deeḅọ fịị nḅẹḅẹ́ a kpọwarị ólóghó ma ḅụ a fiimamam árị mịnị amadọghụḅọgha a ḅọ́rọ́ jẹ́ owiḅọ yaa yaa.

⁴ Anịị anị pịghị ọ nana fịnị ḅara ị́yẹ́ amịnáapụ, anị ólóghó ma gboloma ḅara ḅụ ọmịnị so ọ fịịmam tegó ọmịnị ma anịị Krais ma oju bẹ gbẹ́rẹ́apụ; ọmịnị anị mị́sa n fịị ḅụ saghịma ḅọ ma nyẹẹ wa sọnyẹ sọ bẹ ḅara Tamuno ma fịrịkiri.

⁵ Wamịnị ojumẹnị ḅụ duma kọ sa, ojumẹnị ma tarịarị siinyẹ, ólóghó ma timi saghị nyẹ, fịrịnwangịarị wámịna oju bie, fịị anị mịnanyẹ mamgba dighiḅọ nyẹ.

⁶ Mị́sa, anị fịnị ḅara, ólóghó ma ḅárabie wa pághámaḅomam, tegó wa fịị parị ịkóli pa wa suanyẹ ma pịrịmam. Anịgosi wamịnị olom asọ ma duagha n gịẹ kóróma ólóghó ma bịpịsụ́ụ́ angaá, kụ́ma wamịnị ịwọ asọ ma duam Tẹ́mẹ́ ma bịpịsụ́ụ́ angaá.

Tamuno Ólóghó Ma Wámịna Sii Diepághámam

⁷ Anịsa wa tẹ́ dugho bẹ, wa dugho bẹ ḅẹ́ ólóghó ma ibighaa? Ọkọfịnị nyẹ ofori! Kụ́ma ólóghó ma anị mịẹsị a sii pa sị nyẹ níminyẹ. Ḅọ́rọ́ ólóghó ma dughogha ḅẹ́, <> a nimibịghaa ḅẹ́ jụghọ nyẹ́mọ́ni ólóghó ma na kuragha.

⁸ Kụ́ma anị ólóghó ma ḅụ ḅọ́rọ́ sii asọ dọghụ sị tọ́rụ́kịrịkị́rị́ ojumẹnị tarịarị kuragha nyẹ timi saghịmam ị́yẹ́ duma bie. Ólóghó ma ofori sii kụ́rọ nyanagha.

⁹ Gbẹ́rẹ́sa biri a dumafịnịm na a ólóghó bịpị ma nimigha sáá, kụ́ma a ḅọ ólóghó ma nimiḅọ sa, sịị warị saghị kụ́rọ nyáná ịḅụ,

¹⁰ anị ḅara ma a fịịm. A ḅo arịḅom ḅẹ́ duma akuodum ólóghó bịpị ma, tụ́ma fịị dighiḅọ i pịrịm.

¹¹ Sii warị ólóghó bịpị ma ḅụ ḅọ́rọ́ asọ arịị sị oḅori pa i sị warị pịghị ólóghó ma ḅụ ḅọ́rọ́ i ḅaá.

¹² Anịgo ólóghó ma ḅụgbọrụ tọ́ntọ́, ólóghó bịpị ma tọ́ntọ́, karakáram, pighi ibim.

¹³ Kụ́ma mịma anị die ḅẹ́, ibinyẹ ma ị́yẹ́ fịị dighiḅom? Ọkọfịnịnyẹ ofori. Sịị anịị anị mịẹnyẹ, sii ibinyẹ ma pa fịị dighiḅọ i pịrịm, sị túminị́ anị karakárá fịnị ḅara árị bẹ ḅara. Anịgosi, ólóghó bịpị ma ḅụ ḅọ́rọ́, sii anị ḅụ diem anị sii láa ḅara.

¹⁴ Wa nimim ḅẹ́ ólóghó ma tẹ́mẹ́ ḅụ imi; kụ́ma irị a Tẹ́mẹ́ ḅụ ofori, nnị pa sii dẹrị ómóniḅọ ḅara.

¹⁵ A akanyaḅogha a mịẹarịnyẹ; tegó a mịẹ dọghụnyẹ a ine mịẹgha, kụ́ma a mịẹ dọghụgha nyẹ anịị a mịẹarịnyẹ.

¹⁶ A a mịẹdoghugha nyẹ ma mịẹarị sa, anị dughoarị ḅẹ́ a minim ḅẹ́ ólóghó ma karakáram.

¹⁷ Ịrị anịị mịnanyẹ ma mịẹarịḅọgha; tụ́ma ị́yẹ́ oju bie ngáarị sii ma.

¹⁸ A nimim ḅẹ́ ibi ibiebẹ ngagha, anịị ị́yẹ́ duma bie.

¹⁹ A mịẹ dọghụ ibi ma a ine mịẹgha, anịmanakaragha a mịẹ dọghụgha siinyẹ ma anịị a mịẹarịnyẹ.

²⁰ A ḅọ́rọ́ a mịẹ dọghụgha nyẹ ma mịẹmịẹ, anị dughoarị ḅẹ́ mịnị irịgha nyẹ ma mịẹarịḅọ; anịmanakaragha anị mịẹarịnyẹ anịị ị́yẹ́ duma bie ngáarị sii ma.

²¹ Anịgo a arịḅom ḅẹ́ mịị ólóghó ma fịrị ḅụ imi: a ibinyẹ mịẹ dọghụ sa, siinyẹ anị torukudaarị nyẹ.

²² Bẹ ị́yẹ́ duma bie Tamuno ólóghó ma koko i pụghọ tárịm.

²³ Kụ́ma a jẹ́ ólóghó arịm fịrịnwangịarị nyẹ ị́yẹ́ oju bie, owu pa ikúkúbie miniakị ólóghó ma pághámaarị nyẹ. Anị i mịẹm a ikólinaḅọ sọ pa sii ólóghó ma pịrịm, ị́yẹ́ oju bie fịrịnwangịarị nyẹ.

²⁴ Irị anịị bieḅẹlẹgha owitụ́wọ! Tụọ i dụaḅọ́rọ́ma bẹ, mịị fịị dighiḅọ i pịrịarị oju ma ḅụ?

²⁵ Imiẹḅa fịnị Tamuno pịrịị, i duaḅọ́rọ́maarịḅọ wámịna Nyánáḅọ Jizọs Krais ḅụ ḅọ́rọ́! Anịgo mị́sa ịrị ịḅụgḅọrụ kúkúbie ngéré anị a pa ine Tamuno ólóghó ma koko bẹnyẹ, ị́yẹ́ ojumẹnị warị sii dighiḅoarị ólóghó ma koko.