Romapụ 6 - Ibani New Testament

Fịị Sii Pịrị Kụ́ma Dumafịnị Krais Bie

¹ Anịsa, wa tẹ́ dugho bẹ? Wa siinyẹ mịẹ bịpịmú bẹ si Tamuno ma tọ́rụ́kụrụkụ́rụ́ sẹnị?

² Ọkọfịnị nyẹ ofori! Wa fịị sii pịrịmam, wa tegósi pa anị bie duma kọ bẹ?

³ Ọ́ kọ́kọ́ ibima nimi ḅẹ́ wa mingi sara sa, wa ọkọ mịẹm wa Krais Jizọs na gbẹ́rẹ́nyẹ mịẹbẹ ḅara, wa mingi sara sa wa ọkọ mịẹm pa die ḅẹ́ wamịnị ori na gbẹ́rẹ́ḅụ ḅụ imi ori fịị ḅụ.

⁴ Wamịnị mingi sára ḅụ ḅọ́rọ́ nnị wamịnị na ori na dipi gbolomam wa pịghị ori na fịịm, anịgosi Daḅọ ma Krais saghịma ḅara ori ḅụ́gbérépuma kụ́rọ ḅụ, wamịnị sọ anị ḅara pa ịwọ duma kọbẹm.

⁵ Wa mịị ḅara ma pa ori na gbẹ́rẹ́ ḅụ mịẹmáa ḅara ma ori fịị ḅụ, wa pịghị gbarịgha ḅụ ori na gbẹ́rẹ́ḅụ ḅụ fịnịbẹm sị saghị duma bie sọ ori saghị duma bie sọ ḅara.

⁶ Wa nimim ḅẹ́ wámịna olom ojumẹnị ma nnị anị na Krais ḅaupálịm mgbẹsẹ sị́ ọ́gọ́nọ, sị n siiamịẹnyẹ ojumẹnị ma guluguluma bẹ ḅara, sị anị ḅụ ḅọ́rọ́ wamịnị jẹ́ pa siiamịẹnyẹ ómóniapụ sọbịgha ḅara

⁷ tegó fịịmaá ḅọ sii mịnị kụ́rọ nyanagha n ḅọ oju.

⁸ Wa Krais dua fịịmaá ḅara ma, wa mininim ḅẹ́ wa pịghị ori na duma fịnịbẹm.

⁹ Wa kọkọ nimi ḅẹ́ nnị Krais sághịmamam fịị ḅụ ọ pịghị mịnị jẹ́ pa fịịbịgha; fịị mịnị ọ ḅụ kụ́rọ nyanagha.

¹⁰ Ọ kọ fịị ma, ọ fịị sii pịrịm gbẹ́rẹ́sa ákị mú ḅẹsá ḅẹsá láa, kụ́ma mị́sa ọkọarị duma ma, o duma Tamuno ma pịrịm.

¹¹ Anị gbẹ́rẹ́ ḅara ma anị sii gboloma sa ọmịnị ọḅụ arịị ḅẹ́ ọ fịịmam, kụ́ma dumafịnị sị Tamuno na mịẹgbólóma nyáná Krais Jizọs ḅụ ḅọ́rọ́.

¹² Anịgosi ọ minima sị sii kụ́rọ nyáná ọmịna fịị bẹ ojumẹnị ma pịrị, sị anị tarị siinyẹ gonyẹ́ gonyẹ́ mịẹ.

¹³ Ọmịnị ọmịna oju gbẹ́rẹ́ angaá sọ saghị sii pịrịma ḅẹ́ nnị anị pa sii fịrị nwángị. Anịmanakaragha ọmịnị nnị fịị ḅụ ḅọ́rọ́ma duma bie suaapụ, ọmịnị ọ ḅụ pa Tamuno pịrị, ọmịnị ọmịna oju gbọrụ mamgba saghị Tamuno pịrị sị nnị anị pa karakárá ibiamịẹnyẹ fịrịnwangị.

¹⁴ Sii mịnị ọmịna nyánáḅọ sọbịgha, tegó ọmịnị ólóghó ma sughubie ofori kụ́ma tọ́rụ́kụrụkụ́rụ́ bie.

Karakárá Ibiamịẹnyẹ Ómóniapụ

¹⁵ Anịsa, wa tẹ́ dugho bẹ? Wa pa siinyẹ mịẹbẹ, wa ólóghó sughubie ofori gosi kụ́ma Tamuno tọ́rụ́kụrụkụ́rụ́ ḅụ? Ọkọfịnị nyẹ ofori!

¹⁶ Ọmịnị o nimigha ḅẹ́, ọmịnị ọmịna ḅụ pa jụghọ pịrị sa soḅọ́rọ́ n ḅọ ómóniḅọ sị n ḅọ bịpị pughu, ọmịnị omoni sọ ọ bịpị pughu nyánáḅọ ma pịrịmam ḅọ́rọ́ ọmịnị omoni sọ sii pịrị, fịị dighiḅoarị nyẹ anịgha Tamuno bịpị pughu mịẹsị tumḅọ na Tamuno na karakárá ḅụ ḅụ fịnị.

¹⁷ Kụ́ma wamịnị ịmịẹḅam pa Tamuno ḅẹbẹm! Tegó gbẹ́rẹ́sa biri ọmịnị omoni sọ sii pịrịm, kụ́ma mị́sa ọ nyánáḅọ karakárá dienyẹ ma ọ tẹ́mẹ́ gbọrụ pa anị dughonyẹ mịẹm.

¹⁸ Nnị ọ duaḅọ́rọ́mam sii ḅarabie sị ọ karakárá ibiamịẹnyẹ ómóniapụ sọ.

¹⁹ A éné gonyẹ́ gonyẹ́ ḅụ ọ naarị ẹ́gẹ́rẹ́ pa nyẹ pa o diem ọmịna pologha akanyaḅo gosi. Gbẹ́rẹ́sa biri ọmịnị ọmịna ḅụgbọrụ saghị pa ómóniapụ mịẹ ịlọ́lị duma na ólóghó bịpị pughugha duma pịrịm, anị gbẹ́rẹ́ ḅara ma ọmịnị ọmịna ḅụgbọrụ saghị pa ómóniapụ mịẹ karakárá ibiamịẹnyẹ pịrị, tumḅọ dighi mú tọ́ntọ́ duma bie súúarị nyẹ.

²⁰ Ọmịnị omoni sọ sii pịrị sa, karakárá ibiamịẹnyẹ ọmịna duma bie ofori.

²¹ Ọ tẹ́ sọnyẹ nyánáḅọ, mị́sa ọ ḅụgịrịrịmaarị nyẹ ma ḅụ? Ọḅụkụ́nọma fịị anị mịnanyẹ ma dighiḅoarị nyẹ!

²² Kụ́ma mị́sa n sii ḅárabie ọ duapághámaḅomam sị ọmịnị Tamuno ómóniapụ sọ. Ọmịna sọnyẹ anịị n gbẹ́rẹ́sa saghị ḅọrọma Tamuno pịrị duma, anị kunema anịị duma gbámásó.

²³ Fịị anịị sii gbẹfịnyẹ, kụ́ma Tamuno diepịrịnyẹ anịị duma gbámásó wámịna Nyánáḅọ Krais Jizọs bie.