Romapụ 5 - Ibani New Testament

Minini Diin Na Bieḅẹlẹ Akuom

¹ Mị́sa, minini ḅụ ḅọ́rọ́ n karakárá ibiamịẹnyẹapụ pa wa mịẹmam Tamuno bie, wa Tamuno na diin nyánam wámịna Nyánáḅọ Jizọs Krais ḅụ ḅọ́rọ́.

² O minini ḅụ wamịnị akuoo mịị Tamuno tọ́rụ́kụrụkụ́rụ́ ma bie suam, wa bie mị́sa duma kọarị nyẹ. Anịgosi wa bịpịkpọm wa tọ́rụ́ dighinyẹ nyánam ḅẹ́, Tamuno ma ipine ḅụ wa diekiri nyánábẹm.

³ Anị ḅara ma ngéréghaa kụ́ma wa pịghị dụrụkụ tọ́rụ́siarị pịrịm, tegó wa nimim ḅẹ́ tọ́rụ́siarị mịẹm tumḅọ ngịrịma nyáná,

⁴ ingịrịma mịẹm tumḅọ Tamuno ḅara pụ́nụ́ pịrịnyẹ mịẹḅara nyáná, Tamuno ḅara pụnụ pịrịnyẹ mịẹḅara tọ́rụ́ dighinyẹ akuom.

⁵ Mịị tọ́rụ́ dighinyẹ ma wa gbarịgbarịgha, Tamuno ori ḅẹlẹma pa wámịna kúkúbie saramam ori Tọ́ntọ́ Tẹ́mẹ́ pa, anịị wa ọ ḅara nyáná ḅo diepịrịnyẹ.

⁶ Ọ́ kọ́kọ́ arịị ḅẹ́ sa ma karakárá sa, ịnyọ wámịna ḅụ ófórigha sa, Krais fịị siiamịẹnyẹapụ ma pịrịm.

⁷ Anị ḅụdam kóróma tumḅọ go fịị karakáráma mịẹarịḅọ pịrịbẹnyẹ, anịsọnị tumḅọ ine fịị ibiamịẹnyẹ nyánáḅọ pịrịbẹm.

⁸ Kụ́ma Tamuno diepághámamam ọ wa ḅẹlẹma láa ḅara: wa pa siinyẹ bie fịnị sa Krais fịị wa pịrịm.

⁹ Ori ọrẹ ọmbịnyẹ́ pa karakárá ibiamịẹnyẹapụ pa wa mịẹmam Tamuno fịnịngaa, mịẹ nẹ́ngị nyẹ, ọ wa duaḅọ́rọ́mabẹm Tamuno ma igani ḅụ!

¹⁰ Wamịnị áyá sa Tamuno iruonaapụ, kụ́ma ori oyẹ nángwọ́apụ pa wa mịẹm ọ Tụ́wọ ma fịị ḅụ ḅọ́rọ́. Mị́sa wa Tamuno nángwọ́apụ sọmaa ḅara ma, tẹ́ pịghị kọọ Krais ori duma pa wa duaḅọ́rọ́mabẹm.

¹¹ Kụ́ma anịma ngéréghaa, tego wa dụrụkụ Tamuno mịẹmáa nyẹ ma pịrịm wa Nyánáḅọ Jizọs Krais ḅụ ḅọ́rọ́, Tamuno nangwọapụ pa wa mịẹmáa ḅo.

Fịị Adam Ḅụ Saghịḅom, Duma Warị Krais Ḅụ Saghị Ḅoo

¹² Sii gbẹ́rẹ́ owitụ́wọ ḅụ ḅọ́rọ́ tuminikiri ma sọm, ori sii ma pịghị fịị akuom. Anịgosi fịị tuminikiri gbọrụ mamgba agbam, tegó kị́nị́mamgba siinyẹ mịẹmam.

¹³ Ólóghó ma na ḅogha sa, sii tuminikiri imi; kụ́ma ólóghó ófórigha angaá, n kịẹbịpị nyáná ólóghó pịrịgha.

¹⁴ Kụ́ma Adam sa ḅụ ákị mú Mosis sa ma ḅụ ngaapụ gonyẹ́ gonyẹ́ fịịm, Adam sịbị gánágánáma Tamuno ólóghó ma pịrị ḅara pa siinyẹ miẹghapụ sọ fịịm, Adam anịị ḅo bẹḅọ ma kịkaanyẹ, anịị Jizọs Krais.

¹⁵ Kụ́ma mmẹẹ́ ma gbẹ́rẹ́ ḅara fịnịgha, tegó igbii pa fẹ́ghaa Tamuno dienyẹ ma, anị Adam sii fịnị ḅára fịnịgha. Karakárányẹ ḅẹ́ tọgha túminị́ fịịm anị gbẹ́rẹ́ owitụ́wọ ma sii gosi. Kụ́ma Tamuno tọ́rụ́kụrụkụ́rụ́ ma duḅaḅam, anị ḅara ma anịị diepịrịnyẹ ma so fịnị ḅara, Tamuno pa tọghaapụ pịrịnyẹ gbẹ́rẹ́ḅọ tọ́rụ́kụrụkụ́rụ́ ḅụ ḅọ́rọ́, anịị Jizọs Krais.

¹⁶ Kịrịnyẹ́ imi Tamuno dienyẹ na gbẹ́rẹ́ tumḅọ sii. Adam siinyẹ mịẹ sa Tamuno ọ sịbị ḅẹ́rẹ́kọm ḅẹ́, ḅẹ́rẹ́ ọ ḅárásim; kụ́ma tọghaapụ ḅo siinyẹ mịẹ sa Tamuno ori tọ́rụ́kụrụkụ́rụ́ pa n diem dughoarị ḅẹ́, <<Ḅẹ́rẹ́ ọ́ ḅárasigha!>>

¹⁷ Karakárányẹ ḅẹẹ gbẹ́rẹ́ owitụ́wọ sii ḅụ ḅọ́rọ́, fịị saghị ámá kánámam sị sẹ gonyẹ́ gonyẹ́ taa, gbẹ́rẹ́ owitụ́wọ ma gosi. Kụ́ma gbẹ́rẹ́ owitụ́wọ Jizọs Krais ine anịma nẹ́ngịma nyẹ mịẹm. Tamuno mánámāná tọ́rụ́kụrụkụ́rụ́ ma daakịapụ gonyẹ́ gonyẹ́, igbii gbẹ́gha ḅụ karakárá ibiamịẹnyẹapụ sọm, mịnaapụ ma duma ḅụ sọ́ḅáapụ sọ́bẹm Krais ḅụ ḅọ́rọ́.

¹⁸ Anịsa gbẹ́rẹ́ sii ḅẹ́rẹ́kọ dighiḅọ kị́nị́mamgba pịrị ḅara, anị gbẹ́rẹ́ ḅara ma gbẹ́rẹ́ karakárá ibiamịẹnyẹ fịrị kị́nị́mamgba ḅara ḅẹ́rẹ́ibimam sị duma pa nnị pịrịị.

¹⁹ Gbẹ́rẹ́ tumḅọ bịpịpúghúgháa ḅụ ḅọ́rọ́ tọgha túminị́ ma ḅo siiamịẹnyẹapụ sọm, anị gbẹ́rẹ́ ḅara ma gbẹ́rẹ́ tumḅọ bịpị púghú ḅụ ḅọ́rọ́ tọgha túminị́ ḅo karakárá ibiamịẹnyẹapụ sọ́bẹm.

²⁰ Nnị ólóghó ma pághámaḅom irima mịẹnyẹ sẹ́nị bẹ ḅara. Kuma siiamịẹnyẹ ḅo sẹ́nị sa, Tamuno tọ́rụ́kụrụkụ́rụ́ warị sẹ́nị anị nẹngịma,

²¹ kunema, sii fịị kụ́rọ pa túminị́ taa ḅara ma, anị gbẹ́rẹ́ ḅara ma Tamuno ma tọ́rụ́kụrụkụ́rụ́ ma taám, karakárá ibiamịẹnyẹ ḅụ, sị wamịnị akuoo duma gbámásó bie suu wámịna Nyánáḅọ Jizọs Krais ḅụ ḅọ́rọ́.