Romapụ 2 - Ibani New Testament

Tamuno Karakárá Ḅẹ́rẹ́kọ

¹ Ịrị, ị jẹ́apụ sịbị ḅẹ́rẹ́kọarị? Ị ḅara pụnụ nyẹ nyanagha, Ịrị tụọ tụọ o, ị jẹ́apụ sịbị ḅẹ́rẹ́kọarị sa warị pịghị n mịẹrị nyẹ ma mịẹ, ị ḅẹ́rẹ́pẹ́lẹ́mam ị sịbị.

² Wa nimim ḅẹ́ Tamuno ọ karakáram ọ mịnanyẹ ma mịẹarịapụ sịbị ḅẹ́rẹ́kọarị sa.

³ Kụ́ma ịrị mịnanyẹ ma mịẹarịapụ sịbị ḅẹ́rẹ́kọarịḅọ, ị sị ḅẹ́ ị́ ịḅụ fọ́nyá págháma ḅo bẹ Tamuno ḅẹ́rẹ́kọ ḅụ?

⁴ Anịgha ị Tamuno opu ibi na ori inema tẹ́mẹ́ na ori ngịrịma pa papanyẹ mịẹbẹ, Tamuno ori ibim, ori ibi ma ọ daa mú sii ḅụ pịghị ḅụ súúarị.

⁵ Kụ́ma ọ kụ́rọ kúkúbie na kụ́rọ sịbịbie nyánam gosi, ọmịnị ọmịna fomḅara mịẹm anị gborogboroḅáa, anị éné ma Tamuno ori igani diepágháma bẹ éné sị pịghị karakárá ḅẹ́rẹ́kọọ.

⁶ Tamuno <>

⁷ Jẹ́apụ ibinyẹ mịẹmịẹ tórúku mú ḅụ boma na kuu na gbámásó duma bim, nnị ma Tamuno duma gbámásó pa n pịrịbẹm.

⁸ Kụ́ma nna ḅụ nna ḅụ balaarịapụ sị karakáráma sịghị sị nnị ine irima nyẹ ma mịẹbẹ ḅara, anịapụ ma Tamuno n dighi iganịbẹm sị nna sịbị ḅẹ́rẹ́kọ.

⁹ Oju akụ na tọ́rụ́siarị fịnị siiamịẹnyẹ mịẹarịapụ mamgba pịrịbẹm, Juuapụ parị na pịghị Juughaapụ.

¹⁰ Kụ́ma ibinyẹ mịẹarịapụ gonyẹ́ gonyẹ́ Tamuno boma na kuu na diin pa nnị pịrịbẹm, Juuapụ ma parị na pịghị Juughaapụ.

¹¹ Tegó Tamuno tọ́rụ́kúkúgha ori ḅẹ́rẹ́kọ ḅụ.

¹² Juughaapụ ma, ólóghó ma nyánágháapụ siinyẹ mịẹ sa, nnị nna sịbị ḅẹ́rẹ́kọm ólóghó ma nyánágháapụ ḅara, Juuapụ ma ólóghó ma nyánáapụ siinyẹ mịẹ sa, nnị ólóghó ma pa nna sịbị ḅẹ́rẹ́kọbẹm.

¹³ Ólóghó ma naapụgha Tamuno toruku karakárá ibiamịẹnyẹapụ, kụ́ma ólóghó ma dughonyẹ mịẹapụ.

¹⁴ Juughaapụ ma, nnị Mosis ólóghó ma nyanagha kụ́ma nna tẹ́mẹ́bie ḅọ́rọ́ ólóghó ma dughonyẹ mịẹmịẹ, n diepághámamam ḅẹ́ n nimim nnị mịẹna ibi nyẹ na nnị mịẹna ibighaa nyẹ, karakárányẹ ḅẹ́ nnị ólóghó ma nyanagha mḅẹ́sọ.

¹⁵ Nna mịẹnyẹ diearị ḅẹ́ ólóghó ma dughonyẹ n gịẹ kórómam nna kúkúbie. Nna tẹ́mẹ́bie sọ onyesẹ́arị ḅẹ́ mịma tụ́manyẹ, nna tẹ́mẹ́bie jẹ́ sa ḅẹ́rẹ́si pa n pịrị sa pịghị jẹ́ sa ḅẹ́rẹ́ ibima.

¹⁶ A dugho wásáma ibi oku ma dugho ḅara ḅụ, mịị anị fịnị bẹ ḅara anị éné ḅụ Tamuno Jizọs Krais ḅụ ḅọ́rọ́ túminị́ ḅọ́ghụ́ kóróma ḅụ ḅẹ́rẹ́kọ bẹ sa.

Juuapụ Ma Gboloma Si Ólóghó Ma Dughonyẹ

¹⁷ Mị́sa ọmịnị, ọ ḅọ́rọ́ Juuapụ pa ọ ḅụ sị warị ólóghó ma ḅụ sẹrẹrẹ sị bịpịkpọarị ḅẹ́ Tamuno fịnị ọ pịrịm;

¹⁸ warị nimi Tamuno dọghụnyẹ ḅẹẹ, ọ mịẹ, ọ pịghị ólóghó ma ḅụ ḅọ́rọ́ karakáráma nimimam irima nyẹ ḅụ;

¹⁹ Ọmịnị ibima nimim ḅẹ́, ọmịnị anịị Tọ́rụ́pụ́apụ daa karakárámaariapụ, ọmịnị anị pịghị kánákánábie fịnịapụ tọndọ,

²⁰ nyẹ́nimighaapụ nyẹ́dieapụ, dọghụdọghụ awọ nyẹ́dieapụ, tegó o nimitẹ́lẹ́mam ḅẹ́ ólóghó ma bie níminyẹ na karakárá anị bie bifụ́fụ́m.

²¹ Ịrị anịsa nyẹ pa jẹ́apụ diearịḅọ, ị nyẹ pa ịḅụ diegha? Ịrị dugho wásaámaarịḅọ ḅẹ́ kị́nị́ fúrúma, ịrị ị fúrú fúrú?

²² Ịrị dugho ḅọ ḅẹ́ túminị́ amadọghụma, Ịrị ị́ amadọghụgha? Ị dọghụgha túminị́ susi nkára tamuno pịrị, anịsa nkára tamuno bie fịnị tamunowarị bie ị fúrú fúrú?

²³ Ọmịnị Tamuno ologho ma pa bịpịkpọarịapụ, ọ Tamuno ólóghó ma kaagha si ḅụ́gịrịrị akuoo Tamuno pịrị.

²⁴ Nnị gịẹ kóróma ḅara Tọ́ndiri ma bie ḅẹẹ, <<Ọmịnị Juuapụ ma gosi, Juughaapụ ma Tamuno dughosimaarị.>>

²⁵ Ị ḅọ́rọ́ ólóghó ma koko koko, ị́yẹ́ tọ́ngọ̄ pẹ́lẹ́ ma sọ́nyẹ ḅụ sọ́bẹm; kụ́ma ḅọ́rọ́ ịrị ólóghó ma kokogha kokogha, anị fịnị ḅárá sọ́ḅọ́rọ́ ịrị ị́yẹ́ tọ́ngọ̄ pẹlẹ so pẹ́lẹ́gha.

²⁶ Ḅọ́rọ́ Juughaḅọ tọ́ngọ̄ pẹ́lẹ́ghaḅọ, ólóghó ma dughonyẹ mịẹm, Tamuno ori ákị́bịgha sọ́ḅọ́rọ́ ori tọ́ngọ̄ pẹ́lẹm.

²⁷ Anịgosi ọmịnị Juuapụ ma, Juughaapụ ma ọ sịbị ḅẹ́rẹ́kọbẹm tegó ọmịnị ólóghó ma kaam, anịsọ nị ḅẹẹ, ólóghó ma nnị gịẹ kóróma ọ pịrịm, pịghị ọmịna tọ́ngọ̄ pẹ́lẹ́ Juughaapụ ma ólóghó ma kokom anịsọ nị ḅẹẹ, nnị ḅara pa nna tọ́ngọ̄ pẹ́lẹ́gha.

²⁸ Mịmámgba dughoarị ḅẹ́ túminị́ pa Juuapụ sịapụ mamgba Juuapụgha, tumḅọ pịghị Juuḅọgha, nnị n ḅọ tọ́ngọ̄ pẹ́lẹ́mam gosi,

²⁹ tụ́ma karakárá Juuḅọ anịị dada Juuḅọ biebẹ, anịḅọ ma Tọ́ntọ́ Tẹ́mẹ́ ma tọ́ngọ̄ pẹ́lẹ́ fịrị ma nwángịmam n ḅọ tẹ́mẹ́bie nnị gịẹ kóróma ólóghó ma anị fịrị ma nwángịgha. Ọkọfịnị tumḅọ Tamuno ḅara ḅo túminí nyanaḅoarị, túminị́ ḅara ḅo nyẹ́gha.