Romapụ 16 - Ibani New Testament

Pọl Kunema Sịbịpị

¹ A wámịna mị́naḅọ ọ́rụ́ḅọ Fiibi, gbolomanyẹ dugho ọ pịrịarị, árị anịị Sẹnkiriya sọsị ma ḅụ fịrịnwangịarịḅọ.

² Ọmịnị a daakị Kị́nị́nyánáḅọ ma ẹrẹ ḅụ, Tamuno túminị́ mịẹ na ibiḅara sị a bi ḅárásua gonyẹ́ gonyẹ́ pa a pịrị, tegó a ḅárásua nyáná wámịna ḅụ tọghaapụ pịrịmam ịrịsọ nna ḅụ gbẹ́rẹ́ḅọ.

³ Pirisiliya na Akwila bii i pịrị, i jẹa fịrịnaapụ Krais Jizọs bie.

⁴ Nnị nna duma balagha i sịbị go. Irị ngéréghaa kụ́ma Juughaapụ mamgba sọsị gbọrụ nnị dighi bieḅẹlẹm.

⁵ Nna warị dona dona sọsị ma bii i pịrị. Ị́yẹ́ ibi nangwọ Epenitọs bii, Esiya ḅẹrẹtọ yọ ma ḅụ ori anị parị Krais ḅụ mininiḅọ.

⁶ Meri bii, opuma fịrịnwangị ọ pịrịḅọ.

⁷ Andronikọs na Juniyas bii, i jẹa Juuapụ i nana ikólibie fịnị fịnịapụ. Nfịrịmaapụ ma ogbobie nnị ibima n nimim, nnị pịghị parị ịḅụ Krais asọ duam.

⁸ Ampiliyatọsi bii, Kị́nị́nyánáḅọ ma bie a ḅẹlẹma ḅọ.

⁹ Ubanusi sọ bii, wámịna jẹa fịrịnwangịḅọ Krais bie, na pịghị ị́yẹ́ ibi nangwọ Stasis.

¹⁰ Apelesi bii, mị ḅọ ma diemam ori bịpị pughu láa ḅara Krais bie. Aristobulọsi wárịapụ bii i pịrị.

¹¹ Hẹrọdiọn i jẹa Juuḅọ bii. Na pịghị Krais asọ duaarịapụ Nasisọs wárịbie.

¹² Tịraifịna na Trifosa bii, opuma fịrịnwangị Kị́nị́nyánáḅọ ma pịrị ẹ́rẹ́ámáapụ. Ị́yẹ́ ibi nangwọ Pesis bii, Kị́nị́nyánáḅọ ma bie opuma fịrịnwangịmaá jẹa ọ́rụ́ḅọ.

¹³ Rufọs bii i pịrị, Kị́nị́nyánáḅọ ma sẹlẹakịḅọ, na pịghị o nyingi bii, pịghị nyingi sọ i pịrịmaá ọ́rụ́ḅọ,

¹⁴ Asinkiritọs na Fẹlịgọn na Hemisi na Patirobas na Hamas na pịghị nnị na fịnị Krais asọ duaarị mịnaapụ.

¹⁵ Fịlologọ na Juliya bii, Nẹrẹus na ọ mị́naḅọ ọ́rụ́ḅọ, Olimpas na aningáa nnị na fịnị Tamuno túminị́ mamgba.

¹⁶ Ọ Krais ḅẹlẹma pa jụghọ jụghọ bii. Krais bie fịnị sọsị mamgba fịrịmam ḅẹ́ a o bii.

Kunema Bịpị Pịrị

¹⁷ Mịnaapụ, a ọ tẹ́ghẹ̄m ḅẹ́ ọ tọ́rụ́ pa puama dighiḅoarịapụ ma ḅụ gbánā, mininiapụ mịẹarịapụ sị n bịghị pighi asọ mgbẹsẹ dighiḅọ ọ dáwọ ḅomaá dienyẹ ma pịrịarịapụ. Ḅụ kile nna ḅụ!

¹⁸ Ọkọfịnị nyẹ ma mịẹarịapụ fịrịnwangị wámịna Nyánáḅọ Krais pịrịgha kụ́ma nna opu furo. Nna ḅẹ́lẹ̄ bịpị na túminị́ kombo ẹ́gẹ́rẹ́ nnị oḅori pa ḅẹnyẹ ḅẹnyẹ nímighaapụ sịarị.

¹⁹ Kị́nị́mamgba namam ọmịnị ibi oku ma ọlọ kụrọmamaá ḅara, anịgo a ị dighi bieḅẹlẹm. A dọ́ghụm ḅẹ́ ọmịnị akanyaḅo nyáná ibinyẹ ma ḅụ kuma ḅẹnyẹ ḅẹnyẹ nimi ma siinyẹ gboloma sa.

²⁰ Tamuno, wámịna diin ḅara saghị ḅoḅọ, ḅọlọgha sa Satanị nánga kọsịmabẹm ọmịna ḅụọ sughu. Wámịna Nyánáḅọ Jizọs Krais tọ́rụ́kụrụkụ́rụ́ ọ nana fịnịị.

²¹ Timoti ị jẹa fịrịnaḅọ fịrịmam ḅẹ́ a o bii, Lusiyọs, Jasọn na Sosipata i jẹa Juuapụ sọ fịrịmam ḅẹ́ a o bii.

²² Ịrị, Tẹtius, Pọl dughonyẹ ma gịẹ diri bie suaḅọ o biim Kị́nị́nyánáḅọ ma bie.

²³ Gayọs, a ọ wárị ngáarị ḅo, sọsị ma sọ ọ wárịbie donaarị ḅọ fịrịmam ḅẹ́ a o bii. Ẹratọs, ama igbii koko ḅọ na pịghị wámịna mị́naḅọ owitụ́wọ Kuatọs fịrịmam ḅẹ́ a o bii. [

²⁴ Wámịna Nyánáḅọ Jizọs Krais tọ́rụ́kụrụkụ́rụ́ ọmịnị mamgba na fịnịị.]

Túmíní Tẹ́ghẹ̄

²⁵ O ḅo wa Tamuno ma saghị sóghólóma, ori ine ọ mịẹ bẹḅọ sị ọ kụrọ sẹ ọmịna minini ḅụ, Jizọs Krais gboloma sị a dugho wásáma ibi oku ḅụ ḅọ́rọ́, na pịghị nnị ḅọghuma karakáráma nnị ḅọghuma nyẹ ḅọlọ sáá ene ene, mị́sa nnị anị diepághámamam.

²⁶ Kụ́ma mị́sa ikiakoroapụ ma gịẹ kórómanyẹ ma mịẹmam tọghaapụ ḅo karakáráma nimi, Gbámásó Tamuno ma pịghị bịpị pịrịmam ḅẹ́ sẹ gonyẹ́ gonyẹ́ anị karakárá ma nimii si kị́nị́mamgba minini bẹ ḅara pịghị ọkọ mịẹ.

²⁷ Boma fịnị ori Tamuno ma ngéré pịrị, nyẹ gonyẹ́ gonyẹ́ ḅụ níminyẹ nyánáḅọ Jizọs Krais ḅụ ḅọ́rọ́ ákị mú ḅẹsá láa. Anị ọkọ fịnịị.