Romapụ 15 - Ibani New Testament

Jẹ́apụ Mịẹ Nnị Bieḅẹlẹ Ịḅụ Ngéréghaa

¹ Wamịnị kụ́rọ sẹapụ wámịna minini ḅụ ḅárásua nna minini kụrọghaapụ ma pịrị na ibim sị nna ikúnyẹ ma dighi. Wamịnị wámịna bie ngéré mịẹ ḅẹ́lẹ́mabịgha.

² Ọ́rụ́ḅọ ọ́rụ́ḅọ amịna mị́naḅọ tẹ́mẹ́ miẹḅẹ́lẹ́ma bẹnyẹ mịẹ nna ibi ḅụ, mịẹsị n sẹ́nịbẹnyẹ minini ḅụ.

³ Krais ọ ḅụ go ọ mịẹnyẹ mịẹgha o bieḅẹlẹ bẹ ḅará, anịmanakaragha, n gịẹ kóróma ḅara Tọ́ndiri ma bie, <>

⁴ Ḅọ́rọ́maa sa n gịẹnyẹ ma gonyẹ́ gonyẹ́, n gịẹm pa nyẹ pa wa die bẹ ḅara, sị wamịnị tọ́ndiri ma bie saghị ḅo inema na tẹ́mẹ́kụ́rọ, wamịnị ine tọ́rụ́ dighinyẹ nyáná bẹ ḅara.

⁵ A Tamuno ma tẹ́ghẹ́arị ingịrịma na tẹ́mẹ́kụrọ ḅára saghị ḅoarịḅọ mịẹsị ọ gbẹ́rẹ́ bịpịfie ọ Krais Jizọs ma duarị ḅara,

⁶ sị ọmịnị ine gbẹ́rẹ́ tẹ́mẹ́bie na gbẹ́rẹ́ pụghọ pa Tamuno ma túminị́, wámịna Nyánáḅọ Jizọs Krais Daá ma.

⁷ Ọ jụghọ jụghọ daakị, Krais ma sọ anịsa ọ daákịmaá ḅara sị túminị́ Tamuno ma túmíní.

⁸ A dugho ọ pịrịm ḅẹẹ, Krais o Juuapụ ómóniḅọ dighimam Tamuno karakáráma ḅụ, pa die ḅẹẹ, o minini nna tádọ́apụ ma pịrịnyẹ ori anị mịẹbẹm.

⁹ Juughaapụ ma Tamuno ma túmíní bẹ ḅara ori lolomakúkúbie gosi, Tọ́ndiri ma bie n gịẹ ḅara: <>

¹⁰ Anị pịghị jẹ́ pa dughom, <<Ọmịnị Juughaapụ, ọmịnị Tamuno túminị́ na dụrụkụụ.>>

¹¹ Pịghị jẹ́, <>

¹² Aizaya pịghị jẹ́ pa dughom, <>

¹³ A tẹ́ghẹ̄arị ḅẹ́, Tamuno ma, tọ́rụ́dighi nyẹ ḅara saghị ḅoḅọ opu bieḅẹlẹ na diin pa ọ pịrị, ọmịnị ọ ḅụ nyáná minini ḅụ ḅọ́rọ́ sị ọmịna tọ́rụ́ dighinyẹ sẹnị tórúku tórúku mú Tọ́ntọ́ Tẹ́mẹ́ ma kụrọ ḅụ.

Pọl Go Ọ Gịẹnyẹ Ma Gịẹnyẹ

¹⁴ I jẹa minini mịnaapụ, ịrị ịḅụgḅọrụ mininim ḅẹ́ ọmịnị opuma ibim, ọ pịghị níminyẹ gonyẹ́ gonyẹ́ nyanam, ọ pịghị ine nyẹ pa jụghọ jụghọ diebẹm.

¹⁵ Mịị diri ma bie a ḅáláfaghaa ḅara pa jẹa ẹ́gẹ́rẹ́ sịbị kọmam, pa sima anị pa ọmịna biekóróma. Tamuno nyáná i pịrị tọ́rụ́kụrụkụ́rụ́ gosi, a ḅáláfá nyánágha

¹⁶ ḅẹ́ a Krais Jizọs fịrịnwangịḅọ sọọ Juughaapụ ma pịrị sị Tamuno ma igwagwaḅọ ḅara a Tamuno ma ibi oku dugho wásámaarị, Juughaapụ ma warị ḅo Tamuno daakị bẹ agba sọ, Tọ́ntọ́ Tẹ́mẹ́ fófóoma ọ pịrịnyẹ.

¹⁷ A Krais Jizọs na gbẹ́rẹ́ḅụ ḅụ fịnị ḅara ma, a ine bịpịkpọ ị́yẹ́ Tamuno fịrị ma pịrịm.

¹⁸ A bịpị findi jẹ́nyẹ gobịgha, kụ́ma Krais i pa nwángịmáa fịrị ngéré gbólómanyẹ anịị a dugho bẹnyẹ, anịị asọ pa Juughaapụ ma die ḅẹ́ nnị Tamuno ma osii. A mịma mịẹmam ẹ́gẹ́rẹ́ ḅụ na pịghị fịrị ḅara ḅụ,

¹⁹ kụ́rọ ilíghíma na ḅụ́gbérépuma fịrị, Tọ́ntọ́ Tẹ́mẹ́ ma kụ́rọ ḅụ ḅọ́rọ́. Jerusalem ákị mú Ilirikum párángáa mamgba láa, a bii ḅara pa Krais ma ibi oku ma dugho wásámāmam.

²⁰ I pụghọ tarị sị a mịẹ dọghụnyẹ anịị ibi oku ma dugho wásáma jẹ́ éné na nnị Krais gbolomanyẹ naagha angaá, sị a jụghọ súghúise angaá námabịgha ḅara.

²¹ Tọ́ndiri ma bie n gịẹ kóróma ḅara: <>

²² Anịgosi, tọgha sa nnị i kikimam sị a ọ damaḅo ma.

Pọl Tọm Ḅẹ́ O Rom Muu

²³ Kụ́ma mị́sa a ị́yẹ́ fịrị nwangisómaá ḅara ma mịị párángáa, a pịghị ḅọ́rọ́maa tọgha kụ́rá ḅụ dọghụmam ḅẹ́ a ḅo ọmịna arịị

²⁴ mị́sa a ọkọ mịẹbẹm. A dọghụbẹm a ọmịnị arịị a ḅọ́rọ́ ḅọ́rọ́ Spaini múuarị sa, a pịghị dọghụbẹm ọ ḅárásua ị pịrị sị a ine mú anị ngá ma láa, mịma anịị a kálá sa pa ọmịnị na fịnị fama sa.

²⁵ Mịị gbẹ́rẹ́kiri anị fịnị ḅara, a Jerusalem muarị si a ḅárásua akuoo Tamuno túminị́ ma pịrịbẹ ḅara anị ngá.

²⁶ Masidoniya na Akaya bie fịnị sọsị ma bieḅẹlẹ ḅụ nyẹ ósó pa ḅárásua Jerusalem bie fịnị sị minini igonyiapụ ma pịrịm.

²⁷ Nnị bieḅẹlẹ ḅụụ anị mịẹm, anịị nnị nna ḅara ọlọ sa. Ḅọ́rọ́ Juughaapụ ma Juuapụ ma tẹ́mẹ́ju karịibima ma ḅụ diekiri nyanam, nnị Juuapụ nna ḅara sa ọlọm sị nna tuminikiri ngọ pa nnị na die.

²⁸ Mịị fịrị ma i ḅara faá sa a pịghị n sịbị go daa ḅo igbii ma saghị n ḅárabie sua fama sa, a ḅọ́rọ́ ḅọ́rọ́ Spaini mubẹm sị agbā túlúma o dighi.

²⁹ A nimim ḅẹ́ a ḅo ọ fịnịnga láa sa a bifụfụ Krais karịibima na ḅobẹm.

³⁰ Mịnaapụ, a wámịna Nyánáḅọ Jizọs Krais ẹ́rẹ́ na pịghị Tẹ́mẹ́ ma pịrịarị ḅẹlẹma pa ọ tẹ́ghẹm: ḅẹ́ ọ ḅárásua sị Tamuno tẹ́ghẹ̄ kụrọma i sịbị go.

³¹ Ọ tẹ́ghẹ̄ ḅẹ́ ori i dụaḅọ́rọ́ma mininighaapụ ma ḅárabie Judiya bie, ḅẹẹ, Tamuno túminị́ Jerusalem ḅụ fịnịapụ ma a akuoo ḅárásua ma daákịbẹm.

³² Mịma gosi, a opu bieḅẹlẹ ḅụ ọ dámáḅobẹm, ḅọ́rọ́ anị Tamuno ma ḅụ ḅẹlẹḅẹlẹ, i bieḅẹlẹ bẹ ḅara sị ịnyọ́sárá.

³³ A tẹ́ghẹ̄m ḅẹ Tamuno, diin pa wa pịrịarịḅọ ọmịnị kị́nị́mamgba na fịnịị. Anị ọkọ fịnị.