Romapụ 14 - Ibani New Testament

Mị́naḅọ Sịbị Sii Ḅẹrẹ Kọma

¹ Ori minini kụrọghaḅọ ma daá ḅụ pịrị, kụ́ma ori na nyẹ nụná ma ọ mịẹbẹnyẹ na ọ mịẹbịgha nyẹ.

² Gbẹ́rẹ́ḅọ minini nḅọ warisom nḅọ nyẹ gonyẹ́ gonyẹ́ fị, kụ́ma amịna minini kụrọghaḅọ pẹdiri ngéré pẹm.

³ Nyẹ gonyẹ́ gonyẹ́ fịarịḅọ nyẹ sẹ́lẹ́ḅọ dighi álịmáma, pẹdiri ngéré pẹ́arịḅọ sọ pịghị ḅẹ́rẹ́kọ pẹ́lẹ́ma nyẹ gonyẹ́ gonyẹ́ pẹ́arịḅọ sịbị; tegó Tamuno n ḅọ daa ákịmam.

⁴ Ịrị tụọ jụghọ fịrịnwangịḅọ sịbị ḅẹ́rẹ́kọarị ḅo? Ómóniḅọ ma nyánáḅọ anịị ine dugho bẹḅọ ḅọ́rọ́ ori fịrịnwangịḅọ ibifịrị nwángị anịgha o sii fịrịnwangị nwángịị. Nnị ibifịrị nwángịbẹm tegó Kị́nị́nyánáḅọ ma ine mịẹbẹm sị nnị ibifịrị nwángị.

⁵ Gbẹ́rẹ́ owitụ́wọ gbẹ́rẹ́ éné ákịm ori tọ́ntọ́ éné, jẹ́ owitụ́wọ gbẹ́rẹ́ ḅara pa éné gonyẹ́ gonyẹ́ ákịm. Ọ́rụ́ḅọ ọ́rụ́ḅọ ine dugho amịna ḅụ pịrịbẹm, mịma anị karakárányẹ ma.

⁶ Gbẹ́rẹ́ éné ákịḅọ ḅẹ́ anị éné ma éné mamgba nẹngịm, ọkọ mịẹm pa kuu pa Kị́nị́nyánáḅọ pịrị, n ḅọ árịnyẹ gonyẹ́ gonyẹ́ fị ḅọ, ọkọ mịẹm pa kuu pa Kị́nị́nyánáḅọ pịrị, tegó nnị ịmịẹḅam pa Tamuno ma pịrịm fị́nyẹ ma gosi. Mini jẹa fị́nyẹ fịghaapụ ọkọ mịẹm pa kuu pa Kị́nị́nyánáḅọ ma pịrị, sị pịghị ịmịẹḅam pa Tamuno ma ḅẹẹ.

⁷ Gbẹ́rẹ́ḅọ sọ duma n ḅọ ḅụ ngéré pịrịgha, gbẹ́rẹ́ḅọ sọ fịị n ḅọ ḅụ ngéré pịrịgha.

⁸ Wa duma duma wa duma Kị́nị́nyánáḅọ ma pịrịm, wa fịịfịị, wa fịị Kị́nị́nyánáḅọ ma pịrịm. Anịgo, ḅọ́rọ́ wa duma o wa fịị o, wamịnị Kị́nị́nyánáḅọ ma nyẹẹ.

⁹ Mịma ẹrẹ́sị anịị Krais go fịịnyẹ sị pịghị saghị duma ḅụ, ọ Kị́nị́nyánáḅọ sọ duma na fịịapụ ma pịrịbẹ ḅara.

¹⁰ Ịrị anịsa, pẹdiri ngéré pẹ́arịḅọ, ị tegó ḅẹ́rẹ́kọpẹlẹ ị mị́naḅọ sịbị? Ịrị árịnyẹ gonyẹ́ gonyẹ́ fịarịḅọ ị tegó ị́yẹ́ jẹ́ mịnaapụ dighialịmaarị? Wamịnị Kị́nị́mamgba Tamuno tórúku ḅẹ́rẹ́kọ siri ḅụ sẹ́bẹm.

¹¹ Tọ́ndiri ma bie n gịẹ ḅara: <>

12 Anịgo, wamịnị kị́nị́mamgba wámịna bịpị dugho Tamuno pịrịbẹm n ḅọ mịẹnyẹ, nḅọ pịghị go anị mịẹnyẹ.

Jẹ́apụ Mịẹ Bịghịma Ma

¹³ Anịgo, o ḅoo wa jụghọ jụghọ sịbị ḅẹ́rẹ́kọpẹlẹ ma sẹ́ma. Anịmanakaragha ị kúkúbie mịẹ karakáráma ḅẹ́, ị nyẹ mịẹbịgha mị́naḅọ bịghịma bẹnyẹ anịgha mịẹsị nḅọ siinyẹ bie sọ.

¹⁴ Kị́nị́nyánáḅọ Jizọs ma asọduaḅọ ḅara, a ibi ma mininim ḅẹ́ anị ḅụ na kị́nị́ pilemaarị fị́nyẹ ofori; kụ́ma ḅọ́rọ́ tumḅọ minini minini ḅẹ́ jẹa fị́nyẹ imi kị́nị́ pịlemaarị nyẹ, anịsa anị fị́nyẹ ma warị ḅo kị́nị́ pịlema fị́nyẹ sọ anịḅọ ma pịrị.

¹⁵ Ị nyẹ pa ị mị́naḅọ lama ị fị́fị́nyẹ gosi, anịsa ị mịnị ḅẹlẹma ḅụ nyẹ́miẹgha. Minima sị ị fịarị fị́nyẹ gosi Krais sịbị go fịịḅọ ma ịrị nḅọ guluguluma.

¹⁶ Minima ịrị ibi go mịẹnyẹ, n si ẹ́rẹ́ pa anị sịị.

¹⁷ Tamuno ma kọnsịn ma fị na ḅụ na ḅụghaa, kụ́ma karakárá ibiamịẹnyẹ ḅụ, diin ḅụ, na bieḅẹlẹ ḅụ Tọ́ntọ́ Tẹ́mẹ́ ma pịrịarịnyẹ.

¹⁸ Túminị́ mị ḅara pa fịrịnwangị Krais pịrị sa, n Tamuno mịẹm o bieḅẹlẹ túminị́ pịghị ḅara pụ́nụ́ anị pịrị.

¹⁹ Anịma go, wamịnị wámịna ịnyọ láa ḅara mịẹsị diin akuo bẹnyẹ ma mịẹ, pịghị jụghọ jụghọ kụrọma bẹnyẹ.

²⁰ Mịnị ma sị ị́yẹ́ fị́nyẹ gosi Tamuno nwángịmáa fịrị ma guluguluma. Tumḅọ ine fị́nyẹ gonyẹ́ gonyẹ́ fịbẹm, kụ́ma anị karakáragha ḅẹ́ tumḅọ fị́nyẹ fịị mịẹbẹnyẹ sị jụghọ bịghị siinyẹ bie sọ.

²¹ Tumḅọ mịẹbẹ karakárányẹ anịị n ḅọ nama pẹẹ́bịgha, iru ḅubịgha, anịgha bẹnyẹ bẹnyẹ mịẹsị amịna mịnaapụ bịghị siinyẹ bie sọ.

²² I minini nyẹ gonyẹ́ gonyẹ́ mịnanyẹ ma gbolomanyẹ pa ịrị na Tamuno ogboku wárii. Karịiḅi fịnịị ọ pịrị amịna tẹ́mẹ́ ḅẹ́rẹ́kọ sịrị pa pịrịghaḅọ, anị n ḅọ árị sị mịẹnyẹ ḅẹ́ karakáram.

²³ Kụ́ma ḅọ́rọ́ nḅọ tẹ́mẹ́ mmẹẹ́ mmẹẹ́ mịẹm nḅọ fị́fị́nyẹ ḅụ, Tamuno ọ sịbị sii ḅẹ́rẹ́kọpẹlẹm ori anị fị sa, tegó ọ mịẹnyẹ ma minini ḅugha. Minini ḅụ tumḅọ mịẹgha nyẹ gonyẹ́ gonyẹ́ sii nyẹẹ.