Romapụ 12 - Ibani New Testament

Wa Duma Kọọ Bẹ Ḅara Sị Fịrịnwangị Tamuno Pịrị

¹ Anị ẹrẹ́sị, mịnaapụ, Tamuno ma nyáná wa pịrị opu lolomakúkúbie gosi, a ọ tẹ́ghẹ̄m ḅẹ́ ọmịnị ọmịna ḅụ pa duma igwagwaá Tamuno pịrị, n fófóoma ori fịrị pịrịnyẹ na pịghị ọ ḅẹlẹma nyẹ. Mịma anịị ọmịnị pa ọ pịrịbẹ tụ́ma susi.

² Mịnị tuminikiriapụ dua nnị nyẹ mịẹmịẹ ḅara pa nyẹ mịẹma, kụ́ma wárịso Tamuno biebẹ ọ dima, anịị káara ḅara pa ọmịna kúkúbie dima. Anịsa, o nimibẹm Tamuno ma tọ́nyẹ, ibi nyẹẹ, ọḅụ ḅẹ́lẹ́nyẹ pịghị kpain nyẹ.

³ Tamuno ma ori tọ́rụ́kụrụkụ́rụ́ ḅụ ḅọ́rọ́ pa die i pịrịnyẹ gosi, a dugho ọmịnị kị́nị́mamgba pịrịarị ḅẹ́ gbẹ́rẹ́ḅọ sọ kóróma ma ḅẹ́ n ḅọ opuma duḅamam, n ḅọ ọkọ fịnịgha sa, anịmanakaragha ḅụsímínímá ị́yẹ́ kóróma ḅụ, pịghị ḅẹ́rẹ́kọ ịḅụ pịrị Tamuno ma pa ị pịrị minini láa ḅara ḅụ.

⁴ Ọ́rụ́ḅọ ọ́rụ́ḅọ gbẹ́rẹ́ oju nyanam oju ma pịghị mụmbụ mụmbụ nyanam, mụmbụ mụmbụ ma pịghị nna kịrịkị́rị́ fịrị nyanam.

⁵ Anị gbẹ́rẹ́ ḅara ma, karakárányẹ ḅẹẹ, wamịnị mánámánáapụ, kụ́ma wamịnị gbẹ́rẹ́ ḅụ ḅụ imii Krais bie, wa jụghọ jụghọ na ḅolom, gbẹ́rẹ́ oju ma mụmbụ mụmbụ ḅụ.

⁶ Anịgo ọ́rụ́ḅọ ọ́rụ́ḅọ n ḅọ nyáná dienyẹ ma pa fịrịnwangị, Tamuno ma ori tọ́rụ́kụrụkụ́rụ́ ḅụ ḅọ́rọ́ pa n pịrịnyẹ. Tumḅọ dienyẹ ḅọ́rọ́ ikiakoro, ikiakoro ị́yẹ́ minini láa ḅara.

⁷ Ḅọ́rọ́ pa fịrịnwangị, n ḅọ fịrịnwangịị, ḅọ́rọ́ pa nyẹ́die n ḅọ nyẹ́die;

⁸ ḅọ́rọ́ kị́nị́ tẹ́mẹ́ kụrọma, n ḅọ ọkọ mịẹ. Nyẹ die jẹapụ pịrịarịḅọ gonyẹ́ gonyẹ́ ḅara findi ma pịrị, ḅọ́rọ́ sịbịdá anị ị́yẹ́ dienyẹ i Tẹ́mẹ́ mamgba pa anị mịẹ, ḅọ́rọ́ lolomakúkúbie bieḅẹlẹ pa anị mịẹ.

Ḅẹlẹma Gboloma Dienyẹ

⁹ Karakárá ḅẹlẹma nyáná, siinyẹ ḅẹlẹmama, ibinyẹ ma ọlọ sẹ maá.

¹⁰ Ọ mịnaapụ ḅara pa jụghọ jụghọ ḅẹlẹma, osigha pa jụghọ jụghọ pịrị ọ́ ḅụ nẹ́ngịma.

¹¹ Ịnyọ faá mịẹma, kụ́ma ịnyọ pa fịrịnwangịị. Ị tẹ́mẹ́ gbọrụ pa fịrịnwangị Kị́nị́nyánáḅọ ma pịrị.

¹² Ị́yẹ́ tọ́rụ́ dighinyẹ ịbieḅẹ́lẹ́ma, ingịrịma nyáná ị́yẹ́ ḅụḅáláḅálá mamgba ḅụ, tẹ́ghẹ̄ sámámgba ḅụ.

¹³ Ị nyánányẹ pa nyẹ́ḅụ kụ́rọ mịnaapụ ma na die, pịghị ḅụ́pọ́ findi igoniapụ pịrị.

¹⁴ Tamuno ḅara bii ḅẹ́ ori ị pa tọ́rụ́siarịmaarịapụ ma karịibima, bii ori nnị karịibima, sị ori nnị gbo ma.

¹⁵ Bieḅẹlẹ́arịpụ dua bieḅẹlẹ, owuarịapụ dua owuú.

¹⁶ Diin ḅụ kị́nị́mamgba na ngaa. Opuamịẹnyẹ mịẹma, kụ́ma mịẹkụ oforiapụ ma na nangwọ mịẹ. Nyẹ́nimiḅọ ḅara pa ịḅụ arịma.

¹⁷ Ḅọ́rọ́ tumḅọ ị mịẹ irimam, irima nyẹ pa n ḅọ gbẹ́ẹ̄ ma. Arịị ḅẹẹ, ị karakárányẹ ma mịẹm kị́nị́mamgba toruku.

¹⁸ Ị́yẹ́ ịnyọ láa ḅara mịẹsị kị́nị́mamgba na diin ḅụ fịnịị.

¹⁹ Súghúbima, ị́yẹ́ nangwọapụ, kuma wárịso Tamuno ma igani anị mịẹ, n gịẹ kóróma ḅara tọ́ndiri ma bie, <>

²⁰ Anịmanakaragha, Tọ́ndiri ma bie n gịẹ kóróma ḅara: <<Ḅọ́rọ́ ḅuru ị́yẹ́ iruonaḅọ tarịarị, fị́nyẹ pa ọ pịrị fịị; Ḅọ́rọ́ ọ pụghọ sámụ́nọ́m, nyẹ pa ọ pịrị ḅuu; Ị mịma mịẹarị sa, ị dọghụarị anyị mgbọ́lụ pa ọ sịbị gbánāarị.>>

²¹ Minima siiamịẹnyẹ ị sọ́ḅa, anịmanakaragha ibi pa siinyẹ gbẹ́ẹ̄.