Romapụ 11 - Ibani New Testament

Tamuno Lolomakúkúbie Nyáná Izirẹlịawọ Pịrịm

¹ A warị anịsa gbíla: Tamuno ori ọrẹ a túminị́ sịghịma? Ọkọfịnị nyẹ ofori! Ịḅụgḅọrụ Izirẹlịḅọ, Ebraham bie págháḅo ḅọ, pịghị Benjamin furotụ́wọ.

² Tamuno na oria túminị́ sịghịgha ọ sẹlẹakịapụ sughúsaghị sa. O nimigha Elaija gboloma sị Tọ́ndiri ma bie n gịẹ kórómanyẹ ọ ḅẹ́rẹ́ dugho Tamuno suam Izirẹlịawọ gosi.

³ Elaija dughom: <>

⁴ Tamuno ọ tẹ́ pa ọ pagharaa? <>

5 Anị gbẹ́rẹ́ ḅara ma anịị anị fịnị ḅara mị́sa, kọọ káláapụ imi, Tamuno ori a tọ́rụ́kụrụkụ́rụ́ ḅụ ḅọ́rọ́ sẹlẹakịapụ.

⁶ Tamuno túminị́ sẹlẹakiarị ori tọ́rụ́kụrụkụ́rụ́ ḅụ ḅọ́rọ́, nnị nwángị fịrị ḅụ ofori, anị ḅọ́rọ́ nna fịrị ḅụ ḅọ́rọ́, tọ́rụ́kụrụkụ́rụ́ mịnị tọ́rụ́kụrụkụ́rụ́bịgha.

⁷ Tẹ́ nyẹ anịsa? Izirẹlịapụ dọghụarị nyẹ ma n dọghụḅogha. Tamuno sẹlẹakị káláapụ ma ngéré anịị dọghụḅọ nyẹ; isiapụ ma biripụ́ma pa Tamuno n sị oku ma pịrịm.

⁸ Tọ́ndiri ma bie n gịẹ kóróma ḅara, Tamuno akanyaḅo nyanagha tẹ́mẹ́ pa n pịrịm, tọ́rụ́ ine nyẹ arịgha nyẹ, biri ine nyẹ́ naagha biri, anị ọkọfịnịm ḅo mịmgba éné ma laam.

⁹ Deviti warị dugho: <

¹⁰ Nna tọ́rụ́pụụ́ sị nnị ine nyẹ́arịbịgha ḅara; mịẹsị nna kuku n dama nna iku ḅụḅáláḅálá súghúbie ákị mú ḅẹsá ḅẹsá láa.>>

Anyịma Sua Sị Ḅara

¹¹ A sima gbilam: Juuapụ ma nyẹ nna ḅụọ daa sa, nnị ine mịnị saghịbịgha ḅara pa bịghị? Ọkọfịnịnyẹ ofori! Kụ́ma nna siiamịẹnyẹ gosi, dụaḅọ́rọ́ma ḅo Juughapụ ḅara lámam, sị n mịẹsị Juuapụ nyẹ́mọ́ni.

¹² Kụ́ma ḅọ́rọ́ nna siiamịẹnyẹ ma opu karịiḅi akuo tuminikiri pịrịm nna faá opu karịiḅi akuo Juughaapụ pịrịm. Anịsa karịibima ma anị dụḅa tọrọ́ láa bẹ Juuapụ ma kịẹbịpị ma káara sa!

¹³ A ẹ́gẹ́rẹ́kọọ pịrịarị ọmịnị Juughapụ: ịrị ma Juughaapụ ma nfịrịmaḅọ ḅara ma, a ị́yẹ́ fịrị pa bịpịkpọm,

¹⁴ dighidighigha a ine ị́yẹ́ jẹ́ Juuapụ mịẹsị nnị nyẹ́mọ́ni, si anị ḅụ ḅọ́rọ́ nna ḅụ jẹ́apụ dụaḅọ́rọ́ma.

¹⁵ Tamuno n sịghị sa, tuminikiriapụ mamgba Tamuno iruonaapụ ḅụ fịnịapụ pịghị ḅo ori nángwọ́apụ sọm, anị tọ́rọ́ pa fịnị bẹ anịsa, nnị n daakị sa? Anị fịnị bẹ ḅara anịị fịị ḅụ saghị sị dumaapụ.

¹⁶ Ḅọ́rọ́ parị fịtúrú mpara ma n pa Tamuno pịrịm, anịsa fịturu kpo gbọrụ ma onyẹẹ; ḅọ́rọ́ sị kune ma n pa Tamuno pịrịm, sị ḅara ma pịghị onyẹẹ.

¹⁷ Nnị dipi olivu ma ḅụ n jẹa sị ḅara anyịmasim, n warị owi olivu sị ḅara pa anị na ḅọlọ gboloma. Ọmịnị Juughaapụ ma ọmịnị owi olivu sị ḅara ma kịkam, ọ warị mị́sa saghị Juuapụ tẹ́mẹ́ju ibi fị́nyẹ ma fịarị.

¹⁸ Anịgo nnị ányịmasi sị ḅara ma dighisima ma, ọ ḅọ́rọ́ ọkọ mịẹmịẹ mịma pa biekóróma, ọmịnị kune ma ọlọsẹmagha kụ́ma kune ma anịị ọmịnị ọlọsẹma nyẹ.

¹⁹ Anịsa ọ dọghụbẹm ḅẹẹ, <>

²⁰ Mịma karakárányẹ. Nnị nna anyịmasim nnị mininigha gosi, nnị warị ọ pa nna kiri ḅụ warị, ọ mininim gosi. Kụ́ma anịma pa bịpịkpọ ma; anịmanakaragha ḅáláfaa.

²¹ Ḅọ́rọ́ Tamuno papa Juuapụ ma warịsogha karakárá sị ḅara fịnị ḅara fịnịapụ, ọ papa ọ warịsobịgha.

²² Mịnga wamịnị arịm Tamuno ma ibi láa ḅara na pịghị ori ḅẹ́rẹ́kọ kụ́rọ ḅara. Ori ḅẹ́rẹ́kọ kụrọm bịghịmaapụ ma ḅụ, kụ́ma ibim ọ fịnị angaá, ḅọ́rọ́ ọmịnị ori ibi ma ḅụ sẹ toruku muu. Kụ́ma ọmịnị ọkọ mịẹgha mịẹgha, ọmịnị sọ nnị ọmịnị ányịmásibẹm.

²³ Ḅọ́rọ́ Juuapụ ma nna mininigha ọlọ tórúku mugha mugha, nnị n sima n pa warịbẹm nna fịnịkiri; tegó Tamuno ine anị mịẹbẹm.

²⁴ Ọmịnị Juughaapụ ma fịnị ḅara sọ́ḅọ́rọ́ nnị ányịmasii owi olivu sị ḅara, warị nyẹ́ dipi ólóghó na kuragha ḅụ anị pa karakárá olivu sị ḅụ pẹ́lẹ́suú. Juuapụ ma fịnị ḅára sọ́ḅọ́rọ́ nnị dipi olivu sị ma, anị opuma Tamuno ḅụ sárásárábẹm nnị anyịma sị ḅara ma pa anị ngá sị ḅụ sima pẹ́lẹ́suú.

Tamuno Lolomakúkúbie Nyáná Kị́nị́mamgba Pịrịm

²⁵ Gbẹ́rẹ́ ḅọghu tụ́manyẹ imi, a dọghụnyẹ sị o nimi ị́yẹ́ amịnáapụ, anị minibịgha ọ kọ́rọ́ma ọmịna nyẹ́nimi láa ḅara. Mịị Izirẹlị kụrọ kúkúbie ma fịnị mú kunema láabịgha, kụ́ma anị fịnịbẹm ákị mú Juughaapụ ma kịẹbịpị Tamuno damaḅo bẹapụ kara sa láa.

²⁶ Mịị anịị Izirẹlịapụ mamgba dụaḅọ́rọ́ma nyáná bẹ ḅara Tọ́ndiri ma bie n gịẹ ḅara: <

²⁷ A nnị na mịị ọḅọọ ma fị́ị́bẹm a nna sii siakịị sa.>>

²⁸ Nnị ibi oku ma sịghịm gosi, Juuapụ ma nnị Tamuno iruonaapụ sọmam Juughaapụ ma gosi. Kụ́ma Tamuno ma ori nyẹ sẹ́lẹ́akị ḅụ ḅọ́rọ́ nnị ori nángwọ́apụ nna tádọ́apụ osii.

²⁹ Tamuno tẹ́mẹ́ dima dimagha ọ sẹlẹakiarị ḅọ na ọ karịibimaarịḅọ.

³⁰ Ọmịnị Juughaapụ, ọ Tamuno bịpị puughugha parị sa, kụ́ma mị́sa ọ Tamuno tọ́rụ́kụrụkụ́rụ́ nyanaḅomam tegó Juuapụ ma bịpị puughugha gosi.

³¹ Anị gbẹ́rẹ́ ḅara ma, ọ nyanamaá lolomakúkúbie gosi, Juuapụ ma mị́sa Tamuno bịpị pughugha, nnị sọ ine mị́sa Tamuno lolomakúkúbie nyánáḅọ bẹ ḅara.

³² Tamuno túminị́ mamgba mịẹm nnị bịpị pughugha ikólinaapụ sọ, sị ọ lolomakúkúbie nyáná kị́nị́mamgba pịrịbẹ ḅara.

Túminí Tamuno Gbẹm

³³ Gbẹ́rẹ́ḅọ so ine Tamuno ngọ dụḅa láa ḅara nimiḅobịgha, Ori opu níminyẹ na ori níminyẹ pịghị opuma dụḅam! Tụọ ine nimi bẹ Tamuno kóróma fịnị ḅara? Tụọ ine ori nyẹ́ mịẹ ḅara nimiḅọ bẹ?

³⁴ Nnị gịẹ kóróma ḅara Tọ́ndiri ma bie: <

³⁵ Tụọ jẹ́ éné nyẹ pa Tamuno pịrịma, ori anị ḅụ sima n ḅọ gbẹ́ẹ̄ ḅẹ nyẹ?>>

³⁶ Tegó Ori nyẹ gonyẹ́ gonyẹ́ tẹmẹm, nyẹ gonyẹ́ gonyẹ́ pịghị ọ ḅụ ḅọ́rọ́ dumam pịghị duma ọ pịrịm. Boma fịnị Tamuno ma pịrị ákị mú ḅẹsá ḅẹsá láa! Anị ọkọ fịnị.